Родителството може да биде навистина предизвикувачко. Затоа, не е невообичаено да се видат уморни родители кои мислат дека повеќе не можат да се справат со товарот на родителството. Според неврологот д-р Пуја Агарвал, родителското согорување или исцрпеност е физичка, ментална и емоционална исцрпеност што родителите ја чувствуваат поради хроничниот стрес од родителството.

Со оглед на модерниот, брз начин на живот кој ги принудува родителите да завршуваат повеќе задачи за помалку време, може да се очекува појава на исцрпеност. Меѓутоа, за родителите да ја побараат потребната помош, најпрво е важно да ги препознаат симптомите на родителска исцрпеност. Терапевтот Аби Томасон неодамна преку објава на „Инстаграм“ ги откри четирите најчести знаци на овој синдром кај мајките.

-Доживување емоции, но без да се чувствувате присутни во моментот.
-Заборавност.
-Темпераментност.
-Соматски симптоми, како што се главоболки или абдоминална болка.

Некои знаци можат да ви помогнат да ја разликувате исцрпеноста од вообичаените предизвици на родителството.

-Синдромот на исцрпеност може да изгледа вака: постојано се чувствувате како да не успевате како родител, исцрпени сте до тој степен што не можете да заспиете или, дури и кога спиете, сè уште се чувствувате исцрпени, честопати ги губите нервите со вашите деца или вашиот партнер, не се чувствувате поврзани со нив, не знаете ни како да го контролирате или како да влијаете врз тоа – истакнала таа.

Исцрпувањето кај родителите, особено мајките, е проблем кој не треба да се игнорира. Малите промени, како што се грижата за себе, одморот и разговорот со саканите, можат многу да ги олеснат овие предизвици.

Извор