Како што вели старата кинеска поговорка – читањето десет илјади книги не е толку корисно како да патувате десет илјади километри. Патувањето, без разлика колку е далеку од дома, има многу предности: ја напуштаме удобноста на домот за да истражуваме нови култури, средини и луѓе и да доживееме искуства различни од секојдневниот живот.

Така, покрај отворањето на видиците, рушењето на предрасудите, зајакнувањето на самодовербата и негувањето на толеранцијата, семејните патувања се одлична можност за поврзување.

Сепак, патувањето со деца обично не е лесно и може да биде многу предизвикувачко искуство. Како што растат децата и колку повеќе патувате, тоа станува (обично) „безболно“, но како и секој почеток, така и овој е тежок. Тежок, но никако несовладлив. Сосема спротивно – со подготовка и правилен начин на размислување, сигурно сите ќе уживате во патувањето.

Подготовката е најважна

Ако одите на патување со мали деца, особено ако тоа е нова дестинација, ќе треба однапред да ја истражите и да ги организирате клучните аспекти, како што се транспортот, сместувањето, локациите на маркети и аптеки и преглед на план за активности. Добрата подготовка е клучна за да бидете под што помал стрес. Знаејќи што да очекувате, ќе имате посилно внатрешно чувство за контрола врз ситуацијата, што е клучно за внатрешниот мир и доброто расположение. А вие добро знаете дека расположението се пренесува – децата чувствуваат сè, особено кога родителите не се добро.

Ако вашите деца се доволно возрасни, предложете им да ја истражат избраната дестинација со вас. Нивното активно вклучување во процесот на планирање, покрај тоа што ќе направи да се чувствуваат големи и важни, ќе им овозможи да се чувствуваат поподготвени и позаинтересирани за патувањето. Резултатот? Помалку детски гнев, отпор и досада = повеќе мир и повеќе време за одмор за сите вас.

Останете смирени кога работите ќе тргнат надолу

Најдоброто нешто што можете да го направите за да патувањето со децата да ви биде пријатно искуство е да останете смирени кога работите нема да се одвиваат според планот. А тоа сигурно ќе се случи. Кога работите ќе тргнат наопаку, најдобро е да ги вклучите децата во некоја активност. Задолжително понесете играчки со кои бебето ќе игра, или ако децата се поголеми, дајте им хартија и боички, некоја друштвена игра, аудио или хартиена книга или ако ништо друго „не работи“, дозволете им да седат на телефон или таблет некое време за да можат да гледаат филм или цртан соодветен на возраста. Важно е да им го одвлечете вниманието за да можете да се фокусирате на решавање на ситуацијата.

Откако ќе ги „решите“ децата, седнете и вдишете неколку пати – бидете свесни каде сте, како се чувствувате во моментот.

Запомнете ги причините поради кои сте отишле на патување и сè што вие и вашите деца сакате да однесете дома од патувањето, а тоа секако не се лоши спомени.

Откако ќе се смирите, ќе можете повторно да размислувате рационално и да сфатите дека секој проблем има решение кое можете да го најдете и примените.

Запомнете, децата учат од нас, родителите, и се вистински мали сунѓерчиња – ако видат дека се однесувате неконтролирано, нервозно или неволно, освен што најверојатно ќе им ги предизвикате истите емоции, тие ќе ги научат и на погрешен модел на однесување. Затоа, кога патувате со деца (но и во секојдневниот живот), однесувајте се онака како што сакате вашите деца да се однесуваат при доцнења, разочарувања и кога се тажни. И самите добро знаете дека ако не направите драма, повеќето непријатни ситуации ќе се претворат во искуство на кое еден ден ќе се смеете сите заедно.

Време и место за тишина и одмор

На децата им треба време за одмор и спиење. Погрижете се да спијат доволно ноќта пред патувањето и колку што е можно, обидете се да го одржите нивниот вообичаен распоред за спиење за време на патувањето.

Исто така, секој ден имајте место за тишина – во зависност од возраста на детето, тоа може да биде дремка или ако децата се поголеми, барем мирно да седат, читаат, слушаат тивка музика или да лежат некаде будни. Имено, прекумерната бучава или претесниот распоред на активности може премногу да ги стимулира децата, кои потоа стануваат нервозни и раздразливи. На децата (но и на возрасните) им треба избалансирана комбинација на активности и одмор за да бидат мирни и добро расположени. За овој совет да го даде посакуваниот ефект, важно е да им објасните на децата зошто е важно времето за мир и тишина – сите треба да ги наполниме батериите за да можеме да уживаме во активностите што доаѓаат подоцна.

Опуштете се и препуштете се

Ако сакате да уживате во патувањето со деца, обидете се да се опуштите и да се препуштите.

И покрај сите наши напори, подготовки и планови, животот секогаш има некои планови за нас. Затоа обидете се да се отворите за сè што доаѓа затоа што единствениот момент што навистина го имате е сега, што и да е.

Клучот за уживање во патувањето со деца (и животот воопшто) е да се фокусирате на позитивното во секоја ситуација, дури и на неочекуваното, па дури и на срамот.

Бидете благодарни за времето што можете да го поминете со вашето семејство, дури и ако тоа не е онака како што сте замислиле дека треба да биде. Наместо лутина, фрустрација, незадоволство и преголема грижа за сè да испадне совршено, фокусирајте се на тоа да бидете присутни во моментите што ги имате на располагање и да создадете убави спомени со вашето семејство.

Не заборавајте: децата растат (пре)брзо, а ние старееме исто толку брзо… Сè друго едноставно не се исплати. И, среќен пат!

Автор: Тијана Дебелиќ, психолог
Извор