Претставата ги учи децата да се прифатат такви какви што природата ги создала

Детската куклена претстава „Тоби“, работена по текст на Флоријан Зденек, а во режија на Драгослав Тодоровиќ од Белград, од вечерва во 19 часот е на репертоарот на Театарот за деца и младинци во Скопје. Станува збор за специфична бајка мотивирана од чисти хумани сфаќања, вели режисерот Тодоровиќ. Претставата ги учи децата да се прифатат такви какви што се, какви што ги создала природата.

Насловната улога ја толкува актерката Марија Ѓорѓијовска. Играат и: Катарина Илиевска-Силјановска, Винета Дамческа- Мојаноска, Мики Анчевски, Ана Левајковиќ-Бошков.

За куклите, костимите и сценографијата се погрижи Ирина Сомборац од Белград, со помош на Кирил Василев и Љубица Велкова. Видеоанимацијата е на Емил Петро, а музиката на Виктор Апостолоски.

„Тоби“ е шарена и убава претстава, наменета за најмладата публика, рече директорката Катарина Илиевска-Силјановска.

Режисерот Тодоровиќ сподели дека имале убава соработка со екипата и нагласува дека претставата е заедничко дело. Претставата е за децата, но и за возрасните.