Еден од најголемите извори на стрес за возрасните денес, ако ги исклучиме здравствените и егзистенцијалните проблеми, е патувањето до и од работа. Ако живеете во град или патувате меѓу населени места, пат долг од пет километри може да се претвори во агонија. Брзате да ги земете децата од градинка, секојдневно се чувствувате нервозни, а времето поминато во автомобил или јавен превоз се претвора во најстресниот дел од денот.

Сепак, постои начин овој пат, барем кога станува збор за враќањето дома, да се претвори во нешто конструктивно.

Д-р Адам Фрејзер, експерт за развој на продуктивност, професионален и личен, има предлог за секој што патува на работа и носи нервоза дома од работното место. Тој предлага тоа време да го претворите во тампон-зона која ја нарекува „трето место“.

Што е „трето место“?

Тоа е, накратко, еден вид ментален мост помеѓу стресот што речиси секој го доживува на работа (или на училиште) и она што нѐ чека дома. Сите сакаме да пристигнеме дома насмеани, опуштени. Но, по еден ден во кој можеби сме се судриле со некој од нашите колеги, сме добиле критики од нашиот шеф или имаме многу незавршени работи, ова е многу тешко да се постигне. Затоа Фрејзер предлага да создадете мал ритуал помеѓу работата и домот кој ќе ви помогне да преминете од една во друга фаза од денот.

Целата вечер во голема мера ќе зависи од тоа како ќе се појавите во градинката, кога ќе го земете вашето дете или каков израз ќе видите кога ќе влезете во станот. И сѐ зависи од тоа како ќе го поминете тој период од работа до дома. Искористете ги тие петнаесет минути или половина час на добар начин. Научете се да поставувате прашања како Кој беше најдобриот дел од мојот ден? или Како утре да бидам попродуктивен/а? Ваквите прашања ви помагаат да одморите од работата и да испратите порака до вашиот ум дека работата е завршена за денес.

Друг начин да го искористите времето како тампон-зона и да се одвоите од работата е да слушате интересен поткаст попат. Исто така, прошетката, за оние чија работа не е премногу далеку, е одличен начин да се ослободите од стресот и да се доведете до состојба во која ќе можете порасположени да влезете во куќата.

Прелевањето на деловниот стрес врз приватниот живот е многу чест проблем. Но, ако дизајнирате таква рутина, многу брзо ќе си испратите потсвесна порака дека времето за работа завршило и дека утре ќе размислувате на обврските. И тоа е сигурен начин да станете подобар родител и партнер.

Сето ова, секако, не е доволно доколку не сте решени да ја оставите работата зад себе кога ќе го напуштите работното место. Може да го имате најдобро испланираниот простор за „трето место“ и тоа да нема резултати ако се вратите на проверка на вашата е-пошта дома.

Извор