Здравје

Храна што го подобрува расположението на децата

Храната може да влијае врз среќата на децата, тврдат педијатрите. Имено, истражувањата покажале дека тоа што детето го јаде може позитивно да влијае врз неговото расположение, но и на целокупното ментално здравје, пренесува „Мадерли“.

Стручњаците сметаат дека, на пр., чоколадото или рибата на детето не само што му помагаат во учењето и помнењето, туку може и да го зголемат чувството на среќа. Следуваат уште неколку намирници кои, според стручното мислење, можат да го подобрат расположението на вашето малечко.

1. Разновидно овошје и зеленчук

Добро е познато дека што поразновидни се овошјето и зеленчукот, толку нудат повеќе фитонутритиенти што се борат против стареење на клетките во мозокот и други ткива во телото. Флавоноидите, пак, се поврзани со намалена опасност од депресија и на тој начин влијаат врз доброто расположение.

Во едно истражување со деца на возраст меѓу 7 и 10 години се покажало дека и пиењето сок од боровинки, богат со флавоноиди, ефикасно го подобрува расположението. Општо земено, колку повеќе овошје и зеленчук има на менито на бебето, толку тоа ќе биде позадоволно и посреќно.

2. Зелјести растенија

Говорејќи за нив, особено темните зелјести плодови се богати со железо, фолна киселина, влакна, магнезиум и витамини А и Ц. Овие хранливи материи ја поддржуваат работата на мозокот, но исто така е докажано дека го подобруваат и расположението. Во таа смисла, во исхраната на бебето треба да има цвекло, кељ, спанаќ, блитва и зелена салата.

3. Бобинки
Боровинки, малинки, капини – сите тие содржат голем број антиоксиданси, антоцијани и полифеноли. Тие се делотворни против стресот и го подигнуваат расположението. Исто така, ги подобруваат учењето, концентрацијата и помнењето.

4. Овес

Оваа житарка е одлична за подобрување на расположението поради високата содржина на триптофан и други хранливи материи, како што се витаминот Б, влакна и железо. Овесната каша или, пак, бисквитите – се одличен оброк за малечкото, па освен што се богати со здрави хранливи материи, ќе го подобрат и неговото расположение.

5. Јатки и семиња

Јаткастите плодови и семките содржат влакна, магнезиум и омега-3 масни киселини. Се покажа дека оревите ги намалуваат стресот и напнатоста поради високото ниво антиоксиданси, вклучувајќи омега-3 масни киселини, фолати и витамин Е.

6. Риба

Таа е богата со омега-3 масни киселини, триптофан и витамин Б-6, па педијатрите препорачуваат да му се дава на детето најмалку двапати во седмицата.

7. Тиква, банана и авокадо

Тиквите содржат триптофан и серотонин – хемикалии за мозокот кои поттикнуваат опуштање, а бананите се богати со витамин Б-6. Исто така, бидејќи содржат комбинација од јаглехидрати и растителни влакна, бананите помагаат и за стабилизирање на нивото шеќер во крвта и придонесуваат за поголема контрола на расположението.

И на крај, авокадото – храна богата со витамини, минерали и растителни влакна, докажано придонесува за подобро расположение.

Извор: МИА 

Поврзани написи

Прашај психолог

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца. На прашањата одговараат психолози и психотерапевти соработници на Деца.мк.

To top