Мислевте дека конечно сте ја напуштиле фазата на бессони ноќи, бебето веќе почнува цврсто да спие, конечно се опуштате… и потоа бум! Вашето бебе станува мало дете и сè почнува одново. Ако ова ви се случува вам, не сте сами. Сосема е нормално малите деца на таа возраст да поминат низ таканаречената регресија на сонот. За жал, ова е една од најтешките работи за родителите.

Што е „регресија на сонот“?

Регресијата на сонот или спиењето се однесува на период кога детето кое претходно спиело доста добро одеднаш почнува често да се буди ноќе или одбива да спие во текот на денот. Може да потрае и до шест недели, но секако, зависи од детето и од тоа како вие, како родител, пристапувате кон оваа фаза.

Зошто се случува ова токму сега?

Често се поврзува со развојни скокови – и ментални и физички. Само замислете: толку многу развој, нови искуства, емоции и промени, и сето тоа во мало тело и ум. Не е ни чудо што сонот страда. Па, тоа ни се случува и нам, возрасните, кога поминуваме низ стрес или големи промени, нели?

Исто така, има врска и со никнувањето на забите. Околу 18 месеци, кај децата излегуваат и првите катници, што може да биде доста непријатно и да им го наруши ноќниот сон. А потоа тука е и таа позната тврдоглавост затоа што, да бидеме реални, малите деца се вистински мали независни суштества. Во оваа фаза тие често се однесуваат како да се главни, а тоа вклучува и одбивање да заспијат.

Друга можна причина?

Анксиозност од разделба. Вашето дете може да одбие да спие затоа што не сака да биде одвоено од вас или да се разбуди во 3 часот наутро плачејќи затоа што не ве гледа.

Што можете да направите?

За среќа, експертот за спиење на бебиња Фиона О’Фарел нуди неколку корисни совети кои ќе ви помогнат да ја поминете оваа фаза:

Воспоставете време за тишина и релаксација – Однесувањето на вашето малечко може да ви каже дали е уморно. Многу мали деца на оваа возраст престануваат да спијат во текот на денот, што го отежнува спиењето ноќе. Мозокот на бебето може да се справи со околу пет часа активност пред да му треба пауза, па дури и ако повеќе не дремнува попладне, обидете се да воспоставите време за тишина без премногу стимулација.

Создајте рутина пред спиење – Во оваа фаза децата минуваат низ повеќе транзиции и промени отколку порано. Сето ова може да влијае врз сонот. Размислете дали имало некои нови настани во животот на вашето дете, како што се промена на градинка, болест, преселба… Доследната вечерна рутина ќе му помогне на вашето малечко да се опушти и да се подготви за спиење, особено кога неговиот мозок е „преоптоварен“.

Размислете за промена на времето за спиење – Ако вашето дете е веќе уморно кога се обидувате да го успиете, рутината честопати нема да функционира. Можеби ќе помогне да го поместите времето за спиење малку порано за да избегнете премореност.

Автор: Карина Шиждрак

Извор