Желбата за одредена храна е честа појава во бременоста, а киселите краставички се едни од најпосакуваните производи што трудниците сакаат да ги јадат. Тоа може да изгледа чудно, но причините се сосема нормални.

Хормонални промени

Во текот на бременоста нивото на хормоните прогестерон, естроген и невропептид Y значително расте. Тие влијаат врз апетитот, го зголемуваат чувството на глад и ја менуваат перцепцијата за ситост. Овие промени можат да предизвикаат ненадејна желба за храна што претходно не сте ја сакале.

Промени во вкусот и сетилата

Истражувањата покажуваат дека околу 70 отсто од трудниците имаат промени во мирисот и вкусот. Намалената чувствителност на сол, на пример, може да објасни зошто киселите краставички стануваат толку привлечни. Храната може да има поинаков вкус, па дури и жени кои порано не ги сакале краставичките сега може да станат „опседнати“ со нив.

Недостиг на хранливи материи

Во бременоста чест е недостигот на железо, витамин Д или натриум. Бидејќи обемот на крв и на амнионската течност расте, на телото му се потребни повеќе електролити и соли. Токму тоа може да ја поттикне желбата за кисели краставички или други солени продукти.

Психолошки фактори

Желбата за кисели краставички често е и психолошка. Оваа „класична“ желба за храна на трудниците ја слушаме во филмовите, медиумите и секојдневните разговори, па таа социјална претстава може дополнително да влијае врз желбата.

Освен киселите краставички, чести се желбите за сладолед, чоколадо, чипс или комбинации од слатко и солено. Важно е тие да се задоволуваат умерено и да се внимава на здравјето.

Извор