Иако на мајките им е непријатно да гледаат како го боцкаат нивното мало бебе, тестовите направени на овој начин се навистина важни.

Овој рутински тест се нарекува Гатриев тест и е еден од низата тестови што се вршат како дел од неонаталниот скрининг на бебиња. Тестот испитува две болести – фенилкетонурија и вроден хипотироидизам. Некои лаборатории вршат и скрининг за цистична фиброза, но со согласност од родителите.

Како се врши тестирањето?

Кожата на петицата на новороденчето нежно се сече за да се ослободи крв, која потоа се става на посебна филтер-хартија, по што примерокот се испраќа на анализа. Крвта се зема на овој начин не порано од првите 48 часа по раѓањето, а најдоцна до осмиот ден од животот на бебето.

Резултатите од тестот обично се достапни по една недела, а од породилиштето веројатно ќе ви објаснат дека нема да ве контактираат доколку резултатот е негативен. Од друга страна, доколку резултатот е позитивен, се контактираат родителите за да се упатат на понатамошни процедури за што поскоро да започне терапијата.

Што се фенилкетонурија и вроден хипотироидизам?

Фенилкетонуријата е наследна метаболичка болест, поради која аминокиселината феилинин не се разградува во организмот, туку се акумулира и на тој начин го оштетува централниот нервен систем. Доколку не се открие навреме, може да доведе до ментална ретардација, нарушувања на психосоматскиот развој, па често дури и до епилептични напади.

Вроден хипотироидизам е вродено намалена функција на тироидната жлезда. Кај бебињата кои го имаат овој здравствен проблем тироидните хормони се произведуваат во намалено количество или воопшто не се произведуваат, а доколку не се лекува навреме, може да доведе до ментален пад.

Автор: Наташа Златковиќ

Извор