Прееклампсијата е сериозно нарушување во бременоста, кое се карактеризира со висок крвен притисок и појава на протеини во урината. Иако точната причина сè уште не е позната, единствениот сигурен лек е породувањето.

Кои жени се во ризик?

Оваа состојба најчесто се јавува во првата бременост и по 20. гестациска недела. Ризикот е поголем кај жени кои:

• Имаат хронично висок крвен притисок;
• Имале прееклампсија во претходната бременост;
• Имаат прекумерна телесна тежина;
• Носат повеќе од едно бебе;
• Се помлади од 18 или постари од 40 години;
• Имаат дијабетес, ревматоиден артритис или друг автоимуни нарушувања.

Како да ја препознаете прееклампсијата?

Прееклампсијата се развива постепено, а може да биде поврзана и со претходни бубрежни проблеми. Карактеристични симптоми се:

• Значително зголемување на телесната тежина;
• Висок крвен притисок;
• Намалено излачување урина;
• Појава на протеини во урината;
• Отекување на нозете, лицето и долниот дел од телото.

Кога состојбата станува критична?

Во напредната фаза симптомите стануваат поизразени.

Бремената жена може:

• Да се чувствува уморно и исцрпено;
• Да има главоболки и зуење во ушите;
• Да има нарушен вид;
• Да е нервозна и раздразлива;

Овие симптоми бараат итна медицинска интервенција бидејќи прееклампсијата може да премине во уште поопасна состојба – еклампсија.

Што може да се направи?

Контролата на исхраната, особено намалувањето на солта, редовното мерење на крвниот притисок и следењето на количината и составот на урината се клучни за управување со оваа состојба. Ако имате сомневање за прееклампсија, веднаш консултирајте се со лекар!

Извор