Антибиотиците, лековите за лекување на вообичаени инфекции кај децата и бебињата, веќе не се ефикасни во поголемиот дел од светот, покажа студијата предводена од експерти од Универзитетот во Сиднеј. Овие лекови не дејствуваат добро како порано поради високата стапка на отпорност на антибиотиците.

Многу антибиотици имаат помалку од 50% ефикасност во лекувањето на детските инфекции

Резултатите од студијата покажале дека многу антибиотици препорачани од Светската здравствена организација биле помалку од 50 проценти ефикасни во лекувањето на детските инфекции како што се пневмонија, сепса (инфекции на крвотокот) и менингитис. Наодите покажуваат дека глобалните упатства за употреба на антибиотиците се застарени и дека треба да се ажурираат. Според извештајот на научниците од Универзитетот во Сиднеј, најсериозно погодени региони се Југоисточна Азија и Пацификот, како и Индонезија и Филипините, каде што илјадници деца без потреба ги губат животите секоја година поради отпорност на антибиотици.

Антимикробната отпорност е една од првите 10 глобални закани за јавното здравје

Светската здравствена организација ја прогласи антимикробната отпорност за една од 10. глобални закани за јавното здравје со кои се соочува човештвото. Кај доенчињата, годишно има околу три милиони случаи на сепса во светот, со 570.000 смртни случаи. Многу од нив се должат на недостиг на ефективни антибиотици за лекување на резистентни бактерии.

Наодите од студијата, објавени во списанието „Лансет регионално здравје-Југоисточна Азија“, додаваат сè повеќе докази дека вообичаените бактерии одговорни за сепса и менингитис кај децата често се отпорни на препишаните антибиотици. Затоа, истражувањето открива итна потреба да се ажурираат глобалните упатства за антибиотици за да се решат брзо развивачките стапки на антимикробна резистенција, особено откако најновото упатство на СЗО било објавено во 2013 година.

Познатите антибиотици се сè помалку ефикасни против бактериски инфекции

Студијата покажала дека еден антибиотик, цефтриаксон, веројатно е ефикасен во лекувањето на еден од три случаи на сепса или менингитис кај доенчиња. Лекот е широко користен во Австралија за лекување многу инфекции кај децата, како што се пневмонија и инфекции на уринарниот тракт. Утврдено е дека друг антибиотик, гентамицин, е ефикасен во лекувањето на помалку од половина од сите случаи на сепса и менингитис кај децата. Гентамицинот обично се препишува заедно со аминопеницилини, за кои студиите покажале дека имаат ниска ефикасност во борбата против инфекциите на крвотокот кај бебињата и децата.

Водечкиот автор на студијата, д-р Фиби Вилијамс од Универзитетската школа за јавно здравје и Институтот за инфективни болести во Сиднеј, е специјалист за заразни болести чие истражување се фокусира на намалување на антимикробната отпорност во здравствените установи со високо оптоварување, во Југоисточна Азија. Д-р Вилијамс вели дека има зголемен број на случаи на бактериски инфекции отпорни на повеќе лекови кај децата низ светот.

„Отпорноста на антибиотици расте побрзо отколку што мислиме“

Студијата анализирала 6.648 бактериски изолати од 11 земји во 86 публикации за да ја разгледа чувствителноста на антибиотиците за вообичаени бактерии кои предизвикуваат инфекции во детството. Антимикробната резистенција е повеќе проблем за децата отколку за возрасните, бидејќи е помалку веројатно новите антибиотици да бидат тестирани и достапни за децата. Д-р Вилијамс вели дека студијата треба да биде повик за будење за светот, вклучително и Австралија.

„Ние не сме имуни на овој проблем. Товарот на антимикробната отпорност е на нашиот праг. Отпорноста на антибиотици расте побрзо отколку што мислиме. Итно ни требаат нови решенија за да ги запреме инвазивните инфекции отпорни на повеќе лекови и непотребната смрт на илјадници деца секоја година“, нагласува д-р Фиби Вилијамс, апелирајќи дека најдобриот начин за борба против отпорноста на антибиотици кај детските инфекции е да се даде приоритет на финансирањето истражувања за нови антибиотски третмани за деца и доенчиња.

Дотогаш, д-р Вилијамс истражува стар антибиотик, фосфомицин, како привремен спас за лекување на инфекциите на уринарниот тракт, кои се отпорни на повеќе лекови кај децата во Австралија.

Извор