Мајката и терапевт Андреа, позната на „Инстаграм“ како „@brambila_bits“, споделила како ги учи своите деца на важни животни лекции за пријателствата уште од мали нозе. Нејзината цел е да им помогне да ги препознаат предупредувачките знаци во врските и да се заштитат од несоодветно однесување.

Андреа нагласува дека ова не е исцрпна листа, но овие разговори им помогнале на нејзините деца да развијат самодоверба и да научат да се залагаат за своите права.

-Кога станува збор за безбедноста, секогаш е важно да ги научам да преземат иницијатива – напишала таа.

Како терапевт, Андреа знае колку се важни врските, но и колку е тешко за децата да препознаат што значи здраво пријателство. Затоа таа споделила со своите деца седум предупредувачки знаци, ситуации што можат да укажуваат на нездрави врски:

Пријатели кои не ги почитуваат границите

Андреа ги учи децата дека границите мора да постојат – и физички и вербални. Важно е тие самите да ги постават и да ги почитуваат туѓите. Пријателствата без почитување на границите не можат да бидат здрави.

Пријатели што озборуваат

Ако некој постојано зборува лошо за другите, постои голема веројатност дека ќе ги озборува и своите пријатели кога тие нема да бидат присутни. Андреа често ја споменувала оваа тема со својот син кога бил во основно училиште. Коментарите за нечиј изглед, однесување или облека не се знаци на здрава врска.

Задевање што повредува

Игривото задевање може да биде безопасно, но ако детето се чувствува повредено, тоа треба јасно да се стави до знаење. Ако задевањето продолжи дури и откако ќе каже дека му е непријатно, тоа е јасен знак дека другата страна не го почитува.

Оние што секогаш сакаат работите да се прават по нивно

Андреа објаснува дека вистинските пријателства се засноваат на меѓусебен договор. Таа им кажува на своите деца дека понекогаш можат да попуштат, но дека имаат право да кажат што сакаат и кога нешто не им одговара.

Пријатели што чуваат тајни

Таа им објаснува на своите деца дека е во ред да се почитува нечија приватност, на пример, ако пријателката не сака сите да знаат дека добила прва менструација. Сепак, ако некој ги замоли да сокријат нешто што ги прави да се чувствуваат лошо, на пример молчење за несоодветна содржина, треба веднаш да му кажат на доверлив возрасен.

Оние што никогаш не се извинуваат

Секој прави грешки, но важно е да може да се препознае грешката и да се извини. Ако некој никогаш не го прави тоа, можно е да нема намера да го промени своето однесување. Андреа истакнува дека ова не е добра основа за пријателство.

Оние што ги охрабруваат другите да ги кршат правилата

Андреа сака нејзините деца да го препознаат притисокот од врсниците и да научат да му се спротивстават. Ако некој ги охрабрува да ги кршат правилата, јасно е дека не се грижат за својата безбедност или благосостојба.

Знаењето е најдобрата заштита

Андреа верува дека најдобриот начин да се заштитат од лоши врски е знаењето.

-Децата треба да знаат како изгледа здраво пријателство и кога нешто не е во ред. Ако ги препознаат знаците навреме, ќе им биде полесно да се заштитат – порачува таа.

Нејзината цел е децата да ја знаат разликата помеѓу доброто и лошото и секогаш да знаат дека заслужуваат почит, сигурност и пријатели кои ги ценат.

Извор