Родителските стилови се различни низ културите и генерациите, а секој има свои предности и недостатоци. Иако современите пристапи се променети, некои практики што биле вообичаени пред неколку децении се покажале како корисни за развој на самостојност, отпорност и емоционална стабилност кај децата. Иако денес не секогаш се вклопуваат во модерниот начин на живот, истражувањата покажуваат дека одредени „старомодни“ родителски навики имале долгорочно позитивно влијание.

Семејни вечери

Едно истражување покажува дека децата што редовно вечераат со семејството имаат подобра социјална и емоционална благосостојба, полесно ги регулираат емоциите и создаваат посилни семејни врски. Дополнително, тоа се поврзува со подобар училиштен успех, квалитетни пријателства и подобро физичко здравје.

Игра на отворено без постојан надзор

Истражувањата истакнуваат дека слободната игра на отворено е важна за развојот на детето. Таквите искуства им помагаат на децата да развијат самостојност, снаодливост и отпорност, бидејќи учат да решаваат проблеми и да се справуваат со непријатни ситуации без постојана интервенција од родителите.

Домашни обврски без награда

Децата кои од раното детство учествуваат во домашните обврски често постигнуваат подобри резултати на училиште, имаат поголемо животно задоволство и развиваат вештини потребни за самостојност кога ќе станат возрасни.

Строго време за спиење

Истражувањата покажуваат дека децата со доследна рутина за спиење имаат подобро расположение и поголема способност за емоционална регулација. Редовниот сон во детството се поврзува со поздрав однос кон одморот како возрасни луѓе.

Прифаќање „не“ како одговор

Родителите кои не чувствувале потреба постојано да ги објаснуваат своите одлуки ги учеле децата да ги почитуваат границите. Таа практика помага за развој на разбирање дека другите луѓе имаат право на сопствено време, енергија и простор.

Заштеда наместо постојано купување

Истражување на Универзитетот во Мичиген покажува дека децата уште од петтата година почнуваат да формираат ставови за пари. Учeњето да се чека, штеди и одложувањето на желбите е поврзано со подобра финансиска писменост и одговорен однос кон парите.

Стекнување основни кулинарски вештини

Вклучувањето на децата во готвење и домашни активности во кујната помага за развој на самостојност и здрави навики во исхраната. Тие вештини се пренесуваат преку семејството и често остануваат присутни и во подоцнежниот живот.

Ограничување на времето поминато пред екраните

Поставувањето граници за гледање телевизија ги поттикнувало децата на игра, извршување обврски и развој на други интереси. Тие навики често се пренесуваат и кога детето ќе порасне, овозможувајќи подобра рамнотежа помеѓу одморот, хобијата и обврските.

Извор