Иако може да изгледа дека вежбањето е последното нешто што сакате да го правите по породувањето, постојат неколку причини зошто треба да го промените мислењето.

Постпородилното вежбање може:

• да го подобри вашето расположение со лачење ендорфин, „хормонот на среќата“ во вашето тело;
• да ви помогне да ги изгубите вишокот килограми што сте ги добиле за време на бременоста (со правилна исхрана) и да ја затегнете опуштената кожа;
• да ве заштити од повреди и болка;
• да ја зголемите енергијата;
• да ги зајакнете стомачните мускули, мускулите на срцето и карлицата;
• да ве направи поотпорни за сите предизвици што претстојат.

Вежбање по породувањето: Кога да започнете?

Ако сте се породиле без компликации, можете да започнете со вежбање неколку дена по породувањето, веднаш штом почувствувате дека сте подготвени.

Ако сте имале царски рез или вагинално породување со компликации, прашајте го вашиот лекар кога и како да започнете со вежбање.

Треба да почекате најмалку шест недели со тешки вежби, но можете да пешачите за тоа време. Пешачењето е одлична вежба за почеток.

Не игнорирајте го времето потребно за закрепнување на вашето тело, особено зглобовите и карлицата, кои може да останат нестабилни извесно време под влијание на хормоните кои го олеснуваат породувањето и стомачните мускули, кои може привремено да се одвојат за време на породувањето.

Правила за вежбање

На почетокот може да биде многу тешко да се најде време за вежбање. Задолжително побарајте помош од роднините при креирањето на распоредот, а како што расте детето, вклучете го во вежбањето. Покрај тоа, запомнете ги следниве правила:

• Не заборавајте да се загреете;
• Постепено зголемувајте го интензитетот на вежбите;
• Пијте многу течности;
• Носете градник, а доколку доите, и заштита во случај на истекување на млекото. Погрижете се да најдете удобна долна облека која е дизајнирана според потребите на вашето тело;
• Слушајте го вашето тело. Престанете да вежбате ако чувствувате болка или непријатност.

Препорачани вежби по породување

Доволно е да одвоите 20 минути до половина час за една од препорачаните вежби неколку пати неделно. Овде ги наведуваме вежбите што се лесни за изведување и не го оптоваруваат телото, особено зглобовите и градите. Можете да започнете уште во бременоста и да продолжите по породувањето.

Обрнете посебно внимание на вежбите што се добри за грбот, карлицата и стомачните мускули.

Пешачење

Најлесниот и наједноставниот изговор за да почнете да се движите. Согорува и до 300 калории за еден час, а можете и да одите на прошетка со вашето бебе.

Пливање

Можете да започнете со пливање ако вагиналното крвавење целосно престанало. Пливањето е одлично бидејќи ви овозможува да го истегнете целото тело на релаксирачки начин, без да ги напрегате зглобовите.

Ако пливате градно, не држете ја главата постојано над водата, бидејќи тоа може дополнително да ги оптоварува грбот, вратот и рамената.

Пилатес и јога

Одлични се за зајакнување на стомачните мускули кои се одвојуваат за време на бременоста. Тие можат да останат разделени до една година, затоа не заборавајте да му кажете на вашиот инструктор ако неодамна сте се породиле.

Пилатесот и јогата носат придобивки за ‘рбетот и карлицата.

Вежби за карлицата

Можеби нема да согорите многу калории со нив, но тие се неопходни за враќање на вагиналните мускули во претходната состојба и воспоставување целосна контрола на мочниот меур.

Аеробик, танцување и трчање

Вакви сложени активности не се препорачуваат пред да поминат добри 6-9 месеци од породувањето. Сепак, жените што вежбале пред и за време на бременоста може да почнат порано.

Вежбање и доење

Вежбањето нема негативно влијание врз доењето, ниту пак обратно. Некои студии покажаа дека интензивното вежбање може да предизвика акумулација на млечна киселина во млекото, но тоа е ретко. Проблем можат да бидат само градите полни со млеко, поради што вежбањето може да биде непријатно.

Ако енергичното вежбање ви е приоритет во првите неколку месеци од доењето, размислете за доење или измолзување пред да почнете со вежбите. На овој начин тежината во градите ќе биде помала и полесно ќе вежбате. Исто така, можете да доите половина час до еден час по вежбањето.

Извор