Имитацијата е клучен аспект на развојот на вештините бидејќи ни овозможува брзо и ефикасно да учиме нови работи гледајќи ги оние околу нас. Повеќето деца учат сè, од груби моторни движења, говор, до вештини за интерактивна игра, гледајќи ги родителите, браќата и сестрите и врсниците како ги изведуваат овие однесувања.

Имитирањето е голем дел од детството. Во секоја фаза учиме со гледање, слушање и правење, играње повторливи игри, повторување безброј шеги и имитирајќи ги зборовите на песните. Ние ги учиме социјалните правила со имитација, проучувајќи ги изразите на лицето и говорот на телото и голем дел од јазикот всушност се учи со имитација. Имитирањето е повеќе од едноставна игра на копирање. За децата со аутизам, тоа е клучна вештина што треба да ја развијат за да напредуваат во нивниот социјален, играчки и јазичен развој. Учејќи да имитираат, децата откриваат и забавни нови начини за интеракција со други луѓе, а најмногу учат за време на овие социјални интеракции.

Предлог-активности:

Танцување – Имитирањето танцови движења во песните е одличен начин да го научите вашето дете да имитира груби и фини моторни движења.

Дневни рутини и активности – Можете, исто така, да користите имитација за да го научите вашето дете да завршува задачи како што се четкање заби, самостојно хранење или миење раце. Со моделирање на чекорите и со нивно имитирање за време на природните рутини и активности, можете да ги зајакнете вештините за имитација додека истовремено ќе го научите вашето дете самостојно да ги завршува важните секојдневни животни вештини.

Вокалната имитација – Способноста гласно да ги имитирате другите е потребна не само за да можете да научите да кажувате или изговарате одредени зборови и фрази, туку и да научите како да се вклучите во социјален разговор. Еден начин да се работи на оваа вештина е вашето дете гласно да ве имитира кажувајќи смешни зборови и фрази или да пее песни.

Копирање гестови и изрази на лицето – Искористете ги предностите на промената на пелените за да ги поттикнете бебињата и малите деца да копираат различни гестови и изрази на лицето: намуртено лице, бакнување, плескање итн.

Скокоткање и кикотење – Ќе ви требаат неколку меки пердуви. Забавувајте се манипулирајќи со нив со бебињата и малите деца. Покажете им како можат да ги користат пердувите за скокоткање на различни делови од телото (на пример: раката или горниот дел од стапалата). На почетокот поттикнете ги да скокоткаат делови од сопственото тело. По некое време тие ќе можат да ја скокоткаат вашата рака.

Шминка и покривки за лице – Пред огледало забавувајте се со цртање точка на врвот на носот на секое дете со моливи за шминка. Нацртајте точка и на врвот на сопствениот нос. Поканете ги децата да се восхитуваат на нивниот одраз во огледалото пред да им подадете крпа за лице што можат да ја искористат за да се избрише шминката. Прво измијте го носот за да им покажете што мора да прават. Повторете ја активноста ако децата се заинтересирани.

Списанија, разгледници, книги итн. – Охрабрете ги децата да „читаат“ весници и списанија како нивните родители. Бебињата и малите деца ќе уживаат да манипулираат со материјалот, особено да ги вртат страниците и да им се восхитуваат на сликите. Може да им дозволите да ги кинат страниците, да ги туткаат и да ги користат топчињата хартија што ги создаваат за да полнат разни кутии.

Игри со ѕиркање (постојаност на објектот) – Оваа игра за имитација е совршено приспособена за деца од 10 до 12 месеци. Ќе ви требаат мали ќебиња или марами. Забавувајте се криејќи се зад ткаенината и потоа излегувајте додека велите „ бу“. Поканете ги бебињата и малите деца да го сторат истото.

Гугање – Секогаш кога ќе слушнете како мало дете гуга, посветете му внимание така што ќе се ставите на негово ниво и ќе ги повторите звуците што ги испушта. Ова ќе овозможи убава размена и ќе го промовира развојот на јазикот.

Рими што вклучуваат гестови – Песните и римите што вклучуваат гестови и дејства претставуваат одлични игри за имитација за малите.

Поопширни предлог-активности:

Децата се учат на имитирање така што ќе бидат имитирани, затоа имитирајте го вашето дете – Внимателно гледајте го вашето дете и забележете ги неговите постапки, движења, израз на лицето и звуци. По копирањето, почекајте вашето дете да ви обрне внимание и потоа почнете повторно да копирате. Би било корисно да имате и два комплети одредени играчки, како тапани. На тој начин можете исто така да го имитирате дејството на вашето дете на предмети.

Вклучете активности за имитација додека користите различни играчки – Користете играчка што ја сака вашето дете. Потоа обидете се да се преправате дека играчката е вистинска и подвижна. Направете ги движењата и испуштајте звук што е смешен и привлечен. На пример, земете автомобил, превртете го напред-назад и кажете: врум, врум. На овој начин можете да го привлечете вниманието на вашето дете. Кога ќе го имате неговото внимание, тогаш кажете: „Направи го ова и покажи го движењето повторно.“ Потоа, дајте му го автомобилот на вашето дете и помогнете му да го стори истото. Кога ќе го направи тоа, време е да му покажеме дека завршило одлична работа. Зајакнете го поволното однесување на детето или со тоа што ќе го наградите или,ќе кажете зајакнувачка реченица, како на пример: „Леле! Ти го направи тоа! Добра работа!“ Вратете го автомобилот назад и играјте го истото сценарио повторно и повторно, додека вашето дете не ве копира веднаш и без напор. Обидете се да додадете некои варијации во играта и додавајте нови играчки одвреме-навреме.

Користете огледало за да ги научите движењата на лицето и емоционалните изрази – На пример, користете изрази на лицето и движења како што се дуење на образите, дување или праќање бакнеж. Потоа побарајте од вашето дете да го направи тоа. Кога ќе се обиде да ве имитира, дајте му огледало за да може да се гледа како го менува лицето.

За подучување имитација, изберете функционални движења – За да вежбате имитација, изберете движења кои подоцна може да се користат за учење социјални, емоционални или јазични вештини за развој. На пример, користете изрази на лицето како муртење, насмевка или смеење. Користете и движења на телото како што се покажување или мавтање. Мавнете му на вашето дете и кажете: „Направи го ова.“ Ако вашето дете имитира, пофалете го. Ако не, помогнете му да мавта со тоа што ќе ја земе раката и ќе ја движи. Потоа пофалете го.

Ангажманот е клучен за учењето. Направете го учењето забавно. Обидете се да ја вклучите практиката на имитација во смешни и привлечни игри. Ако играта е привлечна и интересна за вашето дете, тоа ќе соработува повеќе и ќе учи побрзо. Обидете се да ја вклучите имитацијата во игрите што вашето дете ги сака повеќе и обидете се да ги користите играчките што ги сака. Погледнете го внимателно вашето дете и дознајте која е неговата желба и во каков тип игри полесно се занимава.

Помогнете му на вашето дете колку што е потребно, но што е можно помалку. Особено на почетокот, на вашето дете можеби ќе му треба многу помош и многу позитивни повратни информации за да ве имитира. На пример, можеби ќе треба да ја држите неговата рака и целосно да ја придвижите за да му помогнете да мавта или да покаже движење на телото. Но, идејата за учење животна вештина е да бидете сигурни дека вашето дете може самостојно да ја користи таа вештина. Затоа, важно е да ја намалите вашата помош што е можно порано.

Еден начин да се поттикне имитирањето е со учење на детето да ги препознава зборовите „Толку големо“ како игра. Велите „Колку е големо (името на вашето дете)?“ Потоа кренете ги рацете високо над главата и кажете: „Толку големо! Најпрво можете да му помогнете на детето со физичко кревање на рацете над неговата глава. Откако ќе го направите ова многу пати, можеби ќе треба само нежно да ги допрете рацете на вашето дете. Постепено, вашето дете самостојно ќе го имитира движењето. Откако вашето дете ќе може да ги имитира движењата на телото, обидете се да го натерате да додаде некои звуци на движењата. Овие активности дејствуваат како транзиција кон имитација на звуци за говор, бидејќи обезбедуваат практика во вокализацијата за вашето дете, како и можност да ги слушне звуците на говорот во мали чекори.

-Совети за подобрување на вештините за имитација. Пред да предавате имитација, постојат неколку предуслови:
• Останете во седечка положба
• Седнете лице в лице
• Секогаш седете со среќно лице
• Подредете ги материјалите пред да одите да предавате имитација
• Дајте засилување

Повеќе студии потврдија дека имитацијата игра важна улога во развојот на детето. Тие пронајдоа корелации помеѓу количината на имитација што се случува во текот на првите две години од животот на детето и последователниот јазичен и социјален развој. Затоа, не е ни чудо што развојните психолози посветија значително внимание на прашањето како децата ја развиваат способноста за имитирање. Зарем не е интересно кога гледате мало дете како ги имитира вашите движења? Децата сакаат да ги имитираат постапките на другите луѓе, дури и ако таа личност им е непозната. Децата ќе го направат тоа за да научат различни движења и како да користат предмети. Иако ова е точно, имитацијата е многу повеќе, таа е форма на комуникација и е алатка за учење на социјалните вештини.