Родителите често се загрижени бидејќи не се сигурни дали ја прават вистинската работа кога станува збор за воспитувањето и одгледувањето на детето. Дали се премногу строги? Дали премногу им попуштаат? Дали очекуваат премногу или премалку?

Современите мајки и татковци имаат големи очекувања од своите деца, па во нивната силна желба нивното дете да биде подобро од неговите врсници понекогаш се губат.

Надин ван дер Линден, клинички психолог и автор на книгата „Приказни од родителските ровови“, на родителите им дава неколку важни упатства кои јасно ќе им покажат дали ги воспитуваат своите деца на вистински начин.

Детето покажува различни емоции пред вас

На детето му е многу тешко кога не може да се справи со своите емоции. Иако е јасно дека децата, особено постарите, немаат потреба да ги искажуваат сите свои чувства пред родителите, тоа што тие се слободни да покажат гнев, тага или страв е добар знак. Тоа значи дека тие се чувствуваат безбедно со вас. Ако детето ги крие своите емоции од родителите, тоа често значи дека има проблем во вашата врска. Немојте да го осудувате или карате вашето дете за неговите чувства и дајте му за право да биде луто и тажно.

Детето од вас бара помош и утеха кога е повредено или има проблем

Тоа значи дека вие сте негово прибежиште, па мора постојано да го слушате, без разлика дали тоа за што доаѓа кај вас е мал или голем проблем. Ова ќе ви помогне отворено да комуницирате со вашето дете, а кога ќе се почувствува повредено ќе му биде полесно да ја надмине кризата бидејќи знае дека има на кого да се потпре.

Детето без страв може да зборува за своите мисли и чувства

Ова е позитивен знак за флексибилна врска и прифаќање. Некои родители несвесно ја ограничуваат комуникацијата со своите деца поради нивното однесување, на пример, претерување со изразувањето на чувствата што родителите не ги сакаат. Други се премногу кревки и не сакаат да ги оптоваруваат своите деца со своите мисли и чувства. Но, родителите се карпи, а децата никогаш не треба да бидат. Без оглед на тоа што им се случува, родителите треба да ги поддржуваат чувствата на своето дете и во тој поглед да не ги оптоваруваат децата со грижи кои не се соодветни за нивната возраст. Ако ви треба дополнителна поддршка, прашајте возрасен, а не дете.

Кога не ви се допаѓа однесувањето на детето, не критикувајте го детето, туку однесувањето

Добрите родители го критикуваат однесувањето и избегнуваат да го етикетираат детето. Ваша задача е да го советувате и да му укажете каде греши, а не да го омаловажувате. На пример, ако само ги изело сите чоколади, не треба да кажете: „Себичен си“ или „Колку си скржав!“ Наместо тоа, ќе му пријдете со зборовите: „Го изеде чоколадото и не го подели со брат ти/сестра ти“. Во нашата куќа важно е да делиме. Како мислиш дека би можел да надоместиш?“

Ги поттикнувате интересите и талентите на детето

Со развојот на талентите и интересите на детето се развиваат и неговите вештини, а потоа доаѓа успехот. Добрите родители ги слушаат интересите на нивните деца и ги поддржуваат додека напредуваат во она што го сакаат. Не треба да ги принудувате децата да прават нешто што не сакаат да го прават, само затоа што тоа е ваша желба или затоа што мислите дека тоа е добро за нив.

Поставувате граници за детето да биде безбедно

Добрите родители го водат однесувањето на своето дете поставувајќи граници и ограничувања. Децата без граници и правила често запаѓаат во неволја или се губат. Ограничувањата им помагаат да се чувствуваат сакани и ценети, дури и ако всушност не мислат дека ги сакаат. Некои од тие граници кои се добри за нив се, на пример, рутината на спиење и јадење, како и почитување на некои семејни вредности.

Ги поправате вашите грешки

Тоа што сакате да го подобрите односот со вашите деца е знак за добар родител. Ако викате и ја преувеличувате вашата реакција, многу е важно да се обидете да ја подобрите таа врска. Можете отворено да му кажете на вашето дете дека на возрасните понекогаш им е тешко да ги контролираат своите емоции и дека дури и кога сте многу лути, тоа не ја намалува вашата љубов кон нив. Успешното родителство значи обезбедување безбедна поддршка за вашето дете и на тој начин создавање простор за негово напредување. Тоа е врска која трае цел живот и не зависи од надворешни резултати, туку од љубов, почит и поврзаност. Тоа, всушност, значи дека сте одличен родител.

Извор