Марихуаната или канабисот е психоактивна супстанција забранета со закон, чија употреба е широко распространета меѓу младите во светот. Таа се добива од листовите на растението „канабис сатива“.

Сувите листови можат да се пушат (џоинт), да се додаваат во храна, а ако станува збор за течна форма, тогаш може да се користат преку е-цигари (вејп) или да се додаваат во пијалаци.

Доколку марихуаната се пуши, ефектот се јавува веднаш и трае 6 или повеќе часа, а ако се јаде, ефектот се јавува по 30 минути до 1 час и трае 12 или повеќе часа.

Брзите ефекти се манифестираат со еуфорија, промени во расположението, губење на чувството за време, проблеми со размислувањето, оштетување на меморијата, изменети движења на телото. Консумирањето големи количини марихуана не е опасно за живот, но може да предизвика гадење, повраќање, губење контакт со реалноста (халуцинации, параноја), дури и психотична епизода и влошување на шизофренијата.

Долгорочните ефекти се манифестираат со влијанието врз развојот на мозокот кај тинејџерите бидејќи влијаат врз формирањето на нервните врски, што го нарушува размислувањето, концентрацијата, меморијата и учењето, коефициентот на интелигенција се намалува, емоционалната регулација е тешка, како и одлучувањето, а тоа доведува до зависност. Секогаш имајте на ум дека мозокот на адолесцентите се развива до 25-годишна возраст и затоа е почувствителен на која било психоактивна супстанција.

Корисниците на марихуана, во целина, се помалку задоволни од својот живот, имаат полошо ментално и физичко здравје, имаат повеќе проблеми во односите со другите и имаат полош успех во училиште.

Како да препознаете дека детето користи марихуана?

Ако забележите дека вашиот тинејџер ги избегнува обврските на училиште или дома, се откажува од активностите во кои уживал, не се грижи за хигиената, има чести промени во расположението (на пример, раздразлив или параноичен), менува пријатели, има проблеми со членовите на семејството и пријателите, често лаже или крие нешто, има промени во апетитот и спиењето, троши повеќе пари од порано или има повеќе пари, разговарајте и видете во што е проблемот. Сите овие знаци може да укажуваат на тоа дека злоупотребува марихуана и во тој случај треба да побарате стручна помош.

Превенцијата како прва задача

Превенцијата е важна: бидете тука за вашиот тинејџер, покажете љубов и разбирање без да му држите лекции, поставете јасни граници за тоа што очекувате од употребата на која било психоактивна супстанција и бидете информирани за да може да се борите против заблудите за употребата на марихуана.

Автор: д-р Татјана Милошевиќ, педијатар
Извор