Иако често се препорачува како најдобра опција за задоволување на желбата за благо, темното чоколадо можеби не е најдобриот избор за децата.

Кога човек не може да издржи без благо, темното чоколадо се смета за подобра алтернатива. Ова чоколадо содржи помалку шеќер и е богато со антиоксиданси, кои се добри за срцето и мозокот, покажуваат истражувањата. Сосема логично би било да се претпостави дека истото важи и за децата, но експертите велат дека тоа и не е баш така.

Зошто децата треба да внимаваат со консумирањето темно чоколадо?

Педијатрите и нутриционистите предупредуваат дека родителите треба да бидат внимателни кога станува збор за темното чоколадо во исхраната на децата.

– Препорачливо е детето да не јаде премногу темно чоколадо и да го избегнува пред спиење – вели нутриционистката Ејми Рид.

Причината за ова можеби не е очигледна на прв поглед, но треба да знаете дека темното чоколадо содржи кофеин. Иако количината на кофеин е релативно мала, тоа не значи дека треба целосно да се забрани. Доколку детето изеде малку темно чоколадо, нема да му наштети, но како и со секое друго благо, клучна е умереноста.

Колку кофеин содржи темното чоколадо?

Според американското министерство за земјоделство, 30 грама темно чоколадо со 60-69 отсто какао содржи нешто помалку од 25 мг кофеин, што е приближно исто како четвртина шолја кафе.

– Мали количини обично не се проблем. Но, ако се внесе поголема количина, може да предизвика несакани ефекти слични на оние кај возрасните: проблеми со спиењето, вознемиреност, забрзано чукање на срцето, висок крвен притисок, па дури и гадење или пролив – објаснува педијатарот Бет Нат.

Педијатрите генерално не препорачуваат децата да внесуваат кофеин бидејќи тој е присутен и во многу други намирници и пијалаци, но доколку не може целосно да се избегне, барем не треба да се консумира навечер.

Според Американската академија за педијатрија, препорачаниот максимален внес на кофеин е:

Деца од 4 до 6 години: помалку од 45 мг (што е околу 60 г темно чоколадо);
Деца од 7 до 9 години: помалку од 62,5 мг;
Деца од 10 до 12 години: помалку од 85 мг;
Тинејџери (13+ години): најмногу 2,5 мг кофеин по килограм телесна тежина;
Возрасни: до 400 мг кофеин дневно;

Дали консумирањето на темно чоколадо носи и други ризици?

Некои истражувања покажале дека некои видови темно чоколадо може да содржат тешки метали како олово и кадмиум. Сепак, поново истражување од 2024 година утврдило дека дневната консумација од 30 грама темно чоколадо не е штетна за возрасните, но количините на кадмиум можат да бидат загрижувачки за децата.

Затоа, секогаш е важно да се провери декларацијата на производот. Темното чоколадо со помал процент на какао може да биде подобар избор бидејќи содржи помалку кофеин.

На крајот, најважно е да се запомни дека клучна е умереноста.

Извор