„Тажен сум кога го правиш тоа“: Реченици што никогаш не треба да им ги кажувате на децата
Родителите обично не сакаат да им кажуваат на своите деца работи што можат да им наштетат или да ги повредат, но понекогаш тоа го прават несвесно. Уморни, под притисок или фрустрирани откако 600 пати децата го поставиле истото прашање. Исто така, луѓето понекогаш ненамерно повторуваат работи што им биле кажувани уште во детството, за кои не знаеле дека влијаат емотивно.
Ова се неколку потенцијално штетни фрази што треба да ги избегнувате.
1. „Не е ништо страшно“ – Децата често плачат или имаат испади поради работи што изгледаат навистина неважни, но штетно е да ги намалите нивните вистински реакции велејќи им дека драматизираат без причина.
– Оние мали проблеми и емоции се всушност огромни за нашите деца – вели Ејми Мекреди, автор на книгата „Ако треба да ти речам уште еднаш“.
Како што објаснува таа, со вакви коментари им испраќаме порака на децата дека нивните емоции не се важни или дека е глупаво да се плашат или разочараат.
2. „Никогаш не го правиш тоа/секогаш го правиш тоа“ – Децата имаат свои модели на однесување, но да се каже дека секогаш или никогаш не прави нешто, едноставно не е точно. Со вакви изјави ја пропуштате можноста да ги научите што треба и што можат да направат следниот пат.
3. „Тажен сум кога ќе го направиш тоа“ – Фактот дека детето не ве слуша навистина може да ве растажи, но важно е да поставите (и да ги одржувате) граници без да го обвинувате детето за вашите чувства. Тие чувства се ваши, а не негови. Покрај тоа, вие поставувате преседан потенцијално да му дадете до знаење дека има моќ да влијае врз вашето расположение.
– Кога децата ќе се чувствуваат како самите да одлучуваат дали сте среќни, тажни или лути, тие можат да ја искористат можноста и понатаму да ги туркаат вашите граници – вели Мекреди, објаснувајќи дека децата учат да манипулираат со другите.
4. „Остави ме јас да го направам тоа“ – Кога чекате вашето дете да заврши едноставна задача што се чини дека трае вечно, вашиот инстинкт може да ви каже дека едноставно треба да го направите сами. Но, немојте.
– Ако го правите тоа сами, му испраќате порака на вашето дете дека не е способно за тоа, па затоа вие мора да се вклучите. Тоа е обесхрабрувачко и навистина фрустрирачко – вели Мекреди.
