Задача на родителот е да го подготви детето за самостоен живот. А за да биде подготвено за сè што тој живот носи, треба од најмала возраст да се учи на одговорност. Секако, полесно е да се каже отколку да се направи, но сепак постојат чекори што можете да ги следите за да му помогнете на детето да стане одговорно.

Помогнете му да воспостави рутина

Првото нешто што треба да му го всадите на вашето дете е навиката за воспоставување рутина. Таа ќе му помогне подобро да ги организира домашните обврски и училишните задачи, заедно со личните интереси и хобија. Постојаниот распоред му овозможува да ги подели големите задачи на мали и остварливи цели.

Најдобар начин да го научите детето нешто е да му бидете позитивен пример. Воведете рутина за целото семејство. Станувајте рано и легнувајте во одредено време секоја вечер.

Претворете ги секојдневните задачи во навики

Почнете полека, со основни домашни обврски како местење кревет, миење садови. Дозволете му прво да ве гледа како ги извршувате задачите, потоа помогнете му додека не се почувствува подготвено да ги прави самостојно. Кога ќе добие самодоверба, дајте му задача самостојно да извршува некои обврски еднаш неделно. Постепено воведувајте покомплексни работи како перење алишта, приготвување едноставни оброци итн.

Научете го како да закажува состаноци

Често се занемарува оваа вештина, но е исклучително важна: како да се закаже состанок, преку интернет или на телефон. Тоа ќе му помогне да биде посамоуверено кога ќе треба само да закаже преглед кај лекар, состанок во банка и слично.

За да се подготви за тоа, можете да му дадете задача да закажува семејни состаноци. На пример, за стоматолог или мајстор. Важно е и да се научи како да ги следи состаноците и да пристигнува навреме.

Научете го на организациски вештини

Ако не знае каде се наоѓаат важни работи дома и како да ги организира, детето може да има проблеми. Документи, лекови, прва помош, сето тоа треба да биде на безбедно и лесно достапно место.

Можете да го предизвикате детето редовно да ја одржува својата соба чиста и уредна. Покажете му како да чува чувствителни предмети, како да користи фолдери, организатори за фиоки и други алатки за организација.

Опремете го со знаење што спасува живот

Најважната вештина што детето треба да ја има е способноста да се снајде во опасни ситуации. Тоа значи грижа за вредни работи, но и знаење што да прави во случај на пожар или земјотрес. Покажете му каде се излезите во случај на евакуација, како да биде свесно за околината и како да го заштити домот од натрапници.

Ценете го трудот, а не само резултатот

Влегувањето во нова животна фаза не е лесно. Како родител, ќе ја зголемите самодовербата на вашето дете ако го пофалите секогаш кога успешно ќе заврши некоја нова задача.

На крајот, повратните информации околу тоа како се снаоѓа со новите обврски му помагаат да разбере што прави правилно и го мотивираат додека се движи низ целосно нов свет. Еден мал комплимент може многу да помогне.

Извор