Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Моето дете има три години и три месеци. Тој е многу љубопитен, сака сѐ да допре, да види и си игра со дечиња. Пред два месеца тргна во градинка и брзо се навикна. Проблемот е што тешко прозборе и сѐ уште не зборува јасно. Понекогаш ме загрижува тоа што сите негови врсници веќе зборуваат и одговараат на прашања, а тој само ако го прашам, на пример, како се вика татко ти, ме гледа, чека да му кажам за да повтори неразбирливо и толку, потоа не знае. Некогаш не е воопшто заинтересиран да соработува со мене, да зборуваме, сето тоа како насила, кога ќе го прашам нешто, тој прво по негово си брбори за нешто сосема друго, на пример, за диносауруси. Знае кога ќе му кажам да одиме да спиеме или да се бањаме. Понекогаш се плашам да не му е нешто, а ние ништо не преземаме.

ОДГОВОР: Во оваа возраст развојот на говорот генерално се опишува преку неколку параметри и критериуми како: создавање богат речник, детето си го кажува името, возраста, граматиката ја употребува неконвенцијално, зборува само со себе најчесто низ игра, но зборува и за нешта што се во сегашниот момент, поставува прашања кои почнуваат со што, каде, кој, сака да му читаат и има омилени приказни, може со скромен разговор да опише минати случки, правилно користи лични заменки и придавки како јас, мене, мое.

Секако дека секое дете е своја приказна и има свое индивидуално темпо на развој, но советите од стручни лица и процената од логопед никогаш не е на одмет, напротив во едукацијата е и стимулацијата.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.