Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Се обраќам за совет за 6-годишно дете кое има сериозен проблем со одењето на лекар, особено кога се работи за стоматолог. Се трудам да разговараме, сѐ да му објаснам, но не успеваме да стигнеме до ординација. Нема никаква соработка од негова страна, да не речам дека е како несоцијализирано дете, а дури покажува и агресија.
Не ја отвора устата ни само за да му ги видат забите. Пробав на сите можни начини, од казна до награди, незборување, одземање на сѐ што сака, но без успех и веќе не знам кој метод да го применам.

ОДГОВОР: Децата на оваа возраст покажуваат страв од стоматолог, боцкање и игла, ставање капки во око итн. најнапред бидејќи чувствуваат дека немаат контрола врз тоа нешто, а со тоа чувствуваат страв дека ќе доживеат силна болка и силна непријатност за која сметаат и се убедени дека не се подготвени да ја толерираат.

Начинот на кој детето го покажува и имунизира стравот зависи од природата и темпераментот на детето, но и од воспитниот стил и начинот на кој му пристапуваме во дадената ситуација, како и од начинот на кој генерално ја доживува и контролира емоцијата страв.

Доколку сте биле претпазливи од најрана возраст и грижливи за тоа како се движел, паѓал, станувал и се снаоѓал во просторот, тој учи дека многу нешта се непријатни и опасни, а со тоа не ги тестира своите сили и не може да вгради позитивни убедувања за себе како: јас сум еластичен, цврст, отпорен, храбар.

Обидете се да поработите на тој дел од сликата за себе со цел да создадете подлога во соочувањето со одредени искуства, а потоа полека и прецизно зборувајте за негативните последици од неодржувањето на оралната хигиена, како и тоа дека сите сме исти и сите на ист начин ги поправаме забите. Играјте улоги каде што тој е стоматолог, а вие пациент и обратно, и зборувајте за искуството во играта. Додека играте, обидете се преку рефлексија да го презентирате и опишете неговото однесување и чекајте да ви даде конкретни решенија за да се ослободи од стравот кој во моментов го блокира.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.