Децата од градинка може да бидат прилично „тешки“ со своите изливи на бес и барања, но дали нивното однесување е само тоа или има нешто повеќе зад него?

На детето не му е добро и не е свесно за тоа

Дури и кога децата се доволно возрасни за да ви кажат дека не се чувствуваат добро, понекогаш не сфаќаат дека се тажни бидејќи всушност се болни. Ако вашето дете не ви каже дека го боли увото или грлото или дека е болно (што често не знае како да го објасни), можете лесно да ги пропуштите таквите знаци. Ова е причината зошто децата често се мрзливи, се жалат, премногу се вознемирени и ви го „загорчуваат“ животот.

Дава отпор од љубопитност

Како родители, често забораваме колку можат да бидат љубопитни малечките. Големиот свет за нив е огромно игралиште, полно со нови работи за истражување. Љубопитноста е голем дел од човековата природа и не треба да ја потценуваме таа моќ. Децата честопати само сакаат да видат како би било кога би ја користеле нивната соба како платно наместо да сликаат на обичен лист хартија.

Не спиело доволно

Ова е очигледна, но важна причина да се спомене. Има причина зошто зборовите „замор“ и „нерасположеност“ одат заедно, а тоа е многу полошо кај малите деца. Кога малите деца не спијат доволно, тие можат да станат сосема различни мали луѓе во чија близина не сакате да бидете некое време.

Можеби „копира“ туѓо однесување

Малите деца често учат преку копирање на другите: родители, браќа и сестри, пријатели, па дури и ликовите од цртаните филмови! Затоа, кога детето станува агресивно, грубо или намерно непослушно, причината често се крие во имитирањето на друга личност бидејќи децата мислат дека таквото однесување е забавно, кул или правилно.

Се бори со тегоба или анксиозност

Ако вашето дете постојано одбива да оди некаде, насилно е или деструктивно – тоа може да биде затоа што, всушност, се бори со анксиозност. На пример, нервозно или вознемирено дете може да се чувствува исплашено за одредени ситуации и да ви пркоси. Децата кои се љубоморни и анксиозни за нивните помали браќа и сестри и нивниот однос со нивните родители, исто така, може да се однесуваат лошо, што претставува начин да ги изразат овие чувства.

Присутен е некој друг здравствен проблем

Постојат многу други состојби кои децата можат да ги развијат, како што се аутизам, сензорна интеграција, АДХД и Аспергеров синдром – сите состојби кои можат да доведат до форми на бес, агресивно однесување, насилство, отпор и други проблематични однесувања.

Не знае дека прави нешто лошо

Дури и ако вашето дете наскоро ќе тргне на училиште или е веќе на училиште, има уште многу фази кои треба да ги помине во својот развој, знаење и разбирање на светот. Знаеме што ќе се случи ако ја оставиме чешмата отворена, или ако му кажеме на странец дека изгледа дебело, но ако не му објасниме на детето (многу пати) зошто тоа не е соодветно однесување, детето нема да разбере дека прави нешто погрешно. Да не заборавиме дека децата сè уште учат.

Само полека.

Следниот пат кога вашето дете ќе има излив на бес, ќе се однесува насилно или едноставно е грубо, застанете и запрашајте се: дали детето е само злобно или нешто друго е во прашање? Кога ќе погледнеме подлабоко во секоја ситуација, откриваме што навистина се случува и учиме како да се позиционираме, што ќе му помогне на неговото однесување и ќе го подобри долгорочно, но и ќе го запре страдањето на детето и ќе го зачува неговото ментално здравје.

Автор: Наташа Златковиќ

Извор