Седумгодишно дете од Белград било хоспитализирано откако му бил дијагностициран тетанус: тешка, акутна болест. Според првичните информации, детето не било вакцинирано против дифтерија, тетанус и голема кашлица. Иако првично било во тешка состојба, благодарение на лекарите, сега е стабилно.

Што е тетанус?

Тетанусот е сериозна болест на нервниот систем предизвикана од бактерија што создава токсини. Таа предизвикува болни грчеви и вкочанетост на мускулите, особено во вилицата и вратот. Тешките компликации можат да бидат опасни за живот. Лек за тетанус не постои, а третманот се насочува кон ублажување на симптомите и компликациите сè додека токсинот не се исчисти од телото.

Иако вакцините го намалија бројот на случаи, тетанусот и понатаму претставува закана за оние што не се редовно вакцинирани.

Симптоми на тетанус

Инкубацијата, односно времето од инфекција до појава на симптоми, во просек трае околу 10 дена, но може да биде од 3 до 21 ден.

Најчестиот облик е генерализиран тетанус, чиј развој почнува постепено и се влошува во рок од две недели. Обично започнува со вилицата и се шири надолу по телото.

Симптоми:

Болни грчеви и вкочанетост на мускулите на вилицата;
Напнатост на мускулите околу устата, што предизвикува неволна „насмевка“;
Грчеви и вкочанетост на мускулите на вратот;
Тешкотии при голтање;
Вкочанетост на стомачните мускули;

Како што болеста напредува, се јавуваат и повторливи болни грчеви кои траат неколку минути. Вратот и грбот се свиткуваат наназад, нозете се вкочануваат, рацете се привлекуваат кон телото, а тупаниците се стегнати. Вкочанетоста може да предизвика проблеми со дишењето.

Овие напади можат да ги поттикнат и мали дразби како гласен звук, допир, провев или светлина.

Дополнителни симптоми:

Висок или низок крвен притисок;
Забрзана работа на срцето;
Треска;
Прекумерно потење;

Локален и цефаличен тетанус

Локалниот тетанус предизвикува грчење на мускулите околу местото на раната. Иако е поблага форма, може да премине во генерализиран тетанус.

Цефаличниот тетанус е редок облик што настанува по повреда на главата и предизвикува слабост на мускулите на лицето и грчеви на вилицата. И тој може да прерасне во потежок, генерализиран тетанус.

Кога да се побара лекарска помош?

Тетанусот е живото-загрозувачка болест и бара итна медицинска помош при појава на какви било симптоми.

Ако лицето има мала, чиста рана и примило вакцина во последните 10 години, раната може да се третира дома. Но, лекар треба да се консултира ако:

Лицето не било вакцинирано во последните 10 години;
Не е сигурно дали и кога е примена вакцината;
Раната е длабока, од убод, каснато или содржи туѓо тело;
Раната е контаминирана со земја, прашина, измет, ’рѓа или плунка;

Во такви случаи се дава дополнителна доза вакцина, особено ако поминале повеќе од 5 години од последната.

Извор