На ниту еден родител не му е лесно кога детето му е болно и има температура, па затоа педијатарот д-р Лорен Хјуз споделила видео на „Тик-ток“ нудејќи практични совети за родителите кои се грижат за болно дете дома. Таа нагласила дека не е секогаш потребно да се намали температурата ако детето се чувствува добро и нема значителни непријатности.

Таа истакнува дека капењето во ладна вода или обидот да го оладите само може да ја зголеми непријатноста.

-Кога детето има треска, неговото тело активно се обидува да се загрее. Пуштете го да се стопли и да се намести удобно бидејќи тоа ќе му помогне побрзо да заздрави. Температурата има своја цел. Меѓутоа, ако детето не е добро, треба да се даваат лекови за ублажување на симптомите, без оглед на температурата – вели таа.

Родителите не треба да се грижат премногу ако дете одбива храна.

-Тоа е во ред. Најважно е да пијат течности – да пијат, пијат и пијат – вели таа.

Исто така, се нагласува дека детето треба да уринира најмалку три пати во 24 часа. Ако е помалку од тоа, треба да побарате лекарска помош.

Со покачена температура, забрзаното чукање на срцето може да предизвика побрзо дишење, што само по себе не е проблем.

-Загрижувачки е ако детето има тешкотии со дишењето. Може да диши малку побрзо, но не треба да покажува никаков напор – вели Хјуз.

Ако детето повраќа или чувствува гадење, течности треба да се даваат во мали количини.

-Советувам мали, чести голтки. Премногу течност одеднаш може да предизвика повеќе повраќање. Постепеното внесување течности го спречува преоптоварувањето на желудникот. Телото се обидува да го исфрли она што го мачи – објаснува Хјуз.

Извор