Сè повеќе родители го користат овој трик против мачнини кај децата. Дали е ефикасен?
Родителите што следат „Тик-ток“ или „Инстаграм“ можеби веќе наишле на необичен совет кој сè повеќе циркулира на интернет: залепување лепенка во форма на крст преку папокот на нивното дете за да се спречи мачнина при патување. Идејата стана многу популарна на интернет и се користи во автомобили, авиони, па дури и на бродови.
Иако нема научни докази за да се потврди ефикасноста на овој метод, многу родители тврдат дека навистина им помогнал. Некои инфлуенсери, како што се „@tsagana24“ и „@smart.move.family“, ги споделија своите искуства во видеа кои собраа стотици илјади прегледи.
Во едно такво видео, таткото Артем вели: „Овој едноставен трик му помогна на моето дете. Залепивме лепенка преку папокот и немаше мачнина за време на возењето.“
Но, дали овој метод е навистина ефикасен?
Како функционира „трикот со лепенка“?
Самата постапка е многу едноставна. Пред да тргнат на патување, две лепенки се залепуваат во форма на „X“ преку папокот на детето. Некои родители користат и една поголема лепенка. Многумина на социјалните мрежи тврдат дека овој трик ги „спасил“ при долги возења и дека го користат редовно.
Една инфлуенсерка на социјалните мрежи дури сугерира дека трикот би можел да им помогне на возрасните, иако признава дека не знае зошто функционира. Некои шпекулираат дека фластерот ги стимулира акупресурните точки, иако експертите забележуваат дека вистинските точки за ублажување на мачнината се на зглобот, а не на стомакот, и дека акупресурата бара поголем притисок отколку што обезбедува фластерот.
Зошто децата добиваат мачнина при возење?
Мачнината при возење најчесто се јавува поради несовпаѓање помеѓу она што го гледаат очите и она што сензорот за рамнотежа во внатрешното уво го регистрира. На пример, ако детето гледа во екран или книга, телото чувствува движење, но мозокот прима визуелни информации што му кажуваат дека телото е мирно. Оваа конфузија може да доведе до мачнина.
Педијатриската медицинска сестра Кјара Девит објаснува дека едноставното намалување на времето поминато пред екран додека возите ја намалува мачнината кај децата за повеќе од 50 проценти. Храната, пијалаците и недостигот на свеж воздух, исто така, можат да влијаат врз тоа како се чувствува вашето дете додека вози.
Дали фластерот функционира?
Според лекарите, веројатно не.
-Фластерот за папок нема медицински ефект. Најверојатно е плацебо-ефект – вели д-р Али Шехата, специјалист за семејна и итна медицина.
Тој додава дека во папокот нема сензорни нерви кои би влијаеле врз гадењето.
-Фластерот нема да спречи мачнина бидејќи не дејствува на вистинските делови од телото. Но, ако родителите сакаат да го пробаат овој метод, можат, ама да внимаваат фластерот да е чист и да не ја иритира кожата – се согласува сестрата Девит.
Што навистина може да помогне?
Ако вашето дете често има мачнини при патување, овие докажани методи може да бидат покорисни од фластерот:
Избор на вистинско седиште: Седиштата во средината или напред со помалку движење можат да помогнат во намалувањето на вртоглавицата.
Поглед низ прозорецот: Наместо да гледа во екран или книга, охрабрете го вашето дете да го гледа пејзажот.
Природна помош: Ѓумбирот во форма на бонбони, гума за џвакање или капки може да помогнат. За постарите деца, можат да помогнат и ментол бонбоните.
Доволно течности и лесни закуски: Подгответе шише вода и едноставни, лесно сварливи закуски.
Свеж воздух: Повременото отворање на прозорецот или правењето паузи при патувањето може да помогне во намалувањето на мачнината.
Ако мачнината продолжи или стане сериозна, особено ако детето повраќа или одбива да патува, најдобро е да се консултирате со лекар.
