Родителството не се состои само од тоа што правиме секој ден, туку и од пораките што децата ги помнат цел живот. Постојат мали, но моќни гестови и ветувања што родителите можат да им ги дадат на своите деца, а кои им помагаат да се чувствуваат сигурно, сакано и поддржано, дури и додека растат и се соочуваат со предизвиците на светот.

Децата се чувствуваат сигурно и сакано кога од родителите добиваат јасни пораки и чувство на доследност. Иако родителите не можат секој момент да бидат со своите деца, постојат мали, силни гестови и ветувања кои имаат долгорочно влијание врз чувството на сигурност и доверба.

Како што истакнува писателот и музичар Серџ Биеланко, три такви ветувања што родителите можат да им ги дадат на своите деца се:

„Ветувам дека секогаш ќе ти објаснам зошто морав да те казнам“

Децата подобро ги разбираат правилата и границите кога им се објаснуваат причините за нив. Кога се поставуваат граници или казни, важно е да знаат дека тоа е од љубов и грижа за нив.

– Слушај, сакам да ти кажам нешто. Те сакам и жал ми е што денес морав да бидам малку строг кон тебе, но ти ветувам, тоа е затоа што те сакам и се грижам за тебе, и затоа што мојата работа е да ти обезбедам најдобар можен живот. И тоа е најважната работа на светот, во ред? – објаснува музичарот.

Истражувањата покажуваат дека децата чиј родител им ги објаснува причините за правилата и границите подоцна поретко имаат проблеми во однесувањето.

„Ветувам дека ќе те научам како да бидеш добар и љубезен човек“

Учењето на љубезност, почит и емпатија е клучно за развој на емоционална и морална стабилност кај децата.

– Им ветив на моите деца дека низ растењето ќе им всадувам љубезност, разбирање и чесност, за да пораснат во добри и емпатични луѓе. Важно е да разберат дека среќата е поврзана со грижата за другите – нагласува Биеланко.

Оваа поука се пренесува низ секојдневни ситуации, од игри и разговори до обични, заеднички моменти, и им помага на децата да развијат чувство на одговорност и сочувство.

„Ветувам дека ќе правиме забавни работи заедно“

Квалитетното заедничко време ја зајакнува врската и создава спомени што децата ги помнат целиот живот.

– Се обидувам моето време со децата да го направам посебно без оглед дали одиме во библиотека, на саем или едноставно уживаме во заеднички моменти. Не е секогаш лесно, но трудот се исплаќа. Тие спомени остануваат засекогаш – вели тој.

Извор