Научниците открија дека охрабрувањето на децата да јадат риба веројатно ќе има позитивно влијание врз нивниот развој. Истражувачите од Универзитетот во Бристол соопштиле дека морската храна е богат извор на омега-3 масни киселини, селен и јод – за кои претходно беше откриено дека играат важна улога во развојот на мозокот и когнитивната функција.

Како резултат на тоа, тие сакале да истражат дали постои врска помеѓу консумирањето морска храна кај децата на седумгодишна возраст и какви било можни когнитивни и бихевиорални промени на возраст од седум, осум или девет години. Тие испитувале податоци за речиси 6.000 деца во Англија во подолг период. Просечната количина риба што се јаде секоја недела била 123 грама.

Околу 7,2 проценти од децата не јаделе риба секоја недела, 63,9 проценти јаделе до 190 грама неделно, а 28,9 проценти консумирале повеќе од 190 грама риба секоја недела – што е еквивалент на повеќе од две порции.

Рибните прсти и слична исхрана сочинуваат речиси половина (46 проценти) од просечниот вкупен внес на морска храна.

Децата што не јаделе риба имаат поголема веројатност да покажат „неоптимално просоцијално однесување“, според новата студија објавена во „Европскиот журнал за исхрана“

„Просоцијалното“ однесување вклучува пријателски интеракции, алтруизам и споделување.

Седумгодишните деца кои не консумирале риба, во споредба со оние што јаделе најмалку 190 грама риба секоја недела, имале 35 отсто поголеми шанси да покажат „пооптимално просоцијално однесување“. Ова се зголемило на 43 проценти кај деветгодишниците.

Истражувачите, исто така, сакале да проценат дали има мерливи разлики во интелигенцијата на оние што јадат риба и оние што не јадат риба, но не откриле разлики меѓу тестираните осумгодишници, без оглед на нивниот внес на риба.

Колку риба треба да јадат момчињата и девојчињата неделно?
Националната здравствена служба на Велика Британија (НХС) вели дека здрава, балансирана исхрана треба да вклучува најмалку две порции риба неделно, вклучително и една масна риба – како лосос, скуша или сардини.

-На родителите им се советува да им даваат на своите деца барем една порција мрсна риба неделно, но бидејќи мрсната риба може да содржи ниски нивоа на загадувачи кои можат да се акумулираат во телото, момчињата не треба да јадат повеќе од четири порции мрсна риба неделно, а девојчињата не повеќе од две порции неделно.

-Кога има спротивставени совети, може да биде тешко да се знае кој е најдобриот начин на дејствување. Нашите претходни студии покажаа дека јадењето риба за време на бременоста може да има позитивен ефект врз развојот на детето. Ова е откриено и во земјите каде што внесот на риба е поголем отколку кај нас, така што охрабрувањето на потрошувачката на риба веројатно ќе има позитивен ефект врз развојот на децата. Нашите докази кои ја поврзуваат потрошувачката на риба кај децата со најдобриот развој на однесувањето се јасни и силно препорачуваме родителите да обезбедат најмалку две порции риба неделно во согласност со упатствата на НХС. Се надеваме дека овие резултати од истражувањето ќе ги поттикнат родителите да им го дадат на своите деца најдобриот почеток во животот – вели д-р Керолин Тејлор, вонреден професор по исхрана на Универзитетот во Бристол.

Истражувачите користеле податоци од студијата „Децата од 90-тите“, долгорочна студија која ги следи семејствата додека растат децата. Студијата започнала во раните 90-ти и придонела за илјадници истражувачки трудови, а неодамна добила 5,2 милиони фунти за да продолжи да ги следи семејствата во Југозападна Англија.

Извор