Седум одлични рецепти со тиква за бебиња
Тиквата се воведува во исхраната на бебето околу петтиот или шестиот месец. На задоволство на многу бебиња, тиквата може да се користи за подготовка и на солени и на благи кашички, за ручек, ужина или појадок.
1. Пире со јаболко и тиква
Во малку вода сварете ситно исечкано јаболко и малку тиква. Пред крајот на готвењето додајте малку пченкарен гриз и варете уште 5 минути. Соединете ги состојките и испасирајте ги за да добиете квалитетна ужина.
2. Кашичка со месо, тиква и зеленчук
Во малку вода сварете пилешки батак (или карабатак), половина парче тиква, малку кромид и компир. Кога ќе биде готово, исечкајте го месото со нож, а зеленчукот испасирајте го со виљушка. Густината регулирајте ја со водата во која се вареше храната. Ова е хранливо јадење кое може и да се блендира доколку возраста на бебето го бара тоа.
3. Кашичка со тиква и просо
Во малку вода сварете три лажици просо и половина парче тиква. Кога ќе бидат готови, додајте една лажичка павлака и малку јогурт за да ја приспособите густината.
4. Пире од зеленчук
Сварете компир, тиква и малку карфиол. Кога зеленчукот ќе омекне, испасирајте го со виљушка и додајте една лажица полномасна павлака. Ова е одлично јадење бидејќи сладоста на тиквата ја неутрализира киселоста на павлаката.
5. Ручек со тиква, компир и жолчка
Во малку вода сварете ситно исечкан компир, а пред крајот додајте исечкани парчиња тиква. Кога ќе се зготват, изблендирајте ги, додајте ситно сечкан магдонос и изгмечете тврдо варена жолчка. (Додајте осмина, четвртина или половина жолчка, зависно од фазата до која сте стигнале со воведувањето на јајцето).
6. Пире од ориз, тиква и блитва
Сварете едно јајце. Во малку вода сварете околу две лажици ориз. Кога ќе зоврие, додајте една рака парчиња тиква сечкана на коцки и гответе додека не омекне. При крајот додајте два листа блитва и варете уште 2-3 минути. Во чинија извадете ја блитвата, половина од оризот и половина од тиквата, па во тоа изгмечете ја варената жолчка.
7. Ручек со боранија и тиква
Сварете неколку парчиња тиква, а кога водата ќе зоврие, додајте една рака замрзната боранија. Пред крајот на готвењето додајте две лажици ориз и варете додека не омекне. На крајот изблендирајте сè заедно со малку маслиново масло. Ова е одлично јадење, особено кога првпат воведувате боранија во менито.
