Владата да одвои повеќе средства за да се зголеми бројот на лица што добиваат соодветна терапија за нарушување на растот, а и да се подигне свеста и кај институциите и кај граѓаните за комплексноста на проблемот, беше побарано на денешното одбележување на Светскиот ден за подигнување на свеста за растот кај децата.
Александар Петровски, претседател на Здружението на родители на деца со ендокринолошки заболувања „Раст“, упати благодарност до претставниците на институциите за нивните ветувања за решавање на проблемот со рано детектирање на нарушувања на растот кај децата.

– Имаме сериозен проблем поради недоволниот слух од страна на институциите за децата што имаат проблем со нарушувања во растот. Ме радуваат нивните ветувања оти ќе земат заложби и ќе дадат нивен придонес за веќе следната година да бидат постигнати значителни резултати – нагласи Петровски.
Светското искуство, како што наведе тој, покажува дека децата со нарушувања на растот се соочуваат со многу сериозен проблем што се состои во доцното поставување дијагноза и последователно ненавременото лекување.

– Во Македонија во моментов има околу 100 деца со нарушувања на растот кои се лекуваат со хормон за раст. Овој Светски ден повторно го посветуваме на онаа голема група деца кои сè уште чекаат да добијат право на лекување. Право кое им е загарантирано со законот, а никогаш не го добиваат поради подоцна поставена дијагноза и долго поминато време на листата за чекање, поради што стигнуваат до возраст кога веќе не може да се лекуваат бидејќи растот е завршен – истакна Петровски.
Тој упати барање до Владата да одвои поголеми средства со цел да се зголеми листата на пациенти што се лекуваат со хормонска терапија за раст. Вели дека годишно се лекуваат по околу 100 деца, а многу поголем број имаат потреба од неа.