Организирањето роденденска забава за детето е возбудлива работа, но искрено, може да биде и многу заморна. Со толку многу работи за организација, од украси и покани до храна и активности, не е изненадување што многу родители често прават грешки кога го планираат овој голем настан.
За да се осигурите дека роденденот на вашето дете е исполнет со смеа и радост, ова се неколку грешки на кои треба да внимавате кога организирате роденденска забава.
Буџет – премногу или премалку
За секој роденден, најважно е да имате предвид колку сте финансиски моќни. Сите знаете како се движат цените по игротеки и колку пари треба да издвоите за јадење, пијалаци, простор и слично. Од друга страна, доколку мислите дека би ви било поисплатливо да организирате забава дома, земете ги предвид бројните „скриени трошоци“ – од украси за забава, покани, тематски чинии, чаши, сламки, свеќи, детски шампањ и слично.
Избор на игри и декорации
Мајките се познати по тоа што премногу се фокусираат на декорациите на роденденската забава, ја бараат најдобрата роденденска торта, па дури и размислуваат што да облечат (и таа и детето) на роденденската забава. Заробени во вителот на планирањето, забораваат нешто толку едноставно – децата сакаат само да се забавуваат со своите пријатели. Затоа фокусирајте се на забавните активности што ги сака вашето дете и другарчињата, па добро би било да го прашате за неговите омилени игри. Дополнително, ако на забавата се поканети деца од различна возраст, тогаш треба да размислите да организирате нешто што ќе биде интересно за секој според возраста.
Внимавајте поканите да бидат јасни и целосни
Секогаш е најдобро јасно да комуницирате кога испраќате покани за роденден. Мора да го напишете името на детето, датумот на забавата, времето на започнување, времето на завршување, адресата, информациите за одговор на повикот и датумот и дали возрасните и браќата и сестрите се добредојдени. Доколку правите забава дома, би било добро да ги информирате за деталите за паркирањето и да ги прашате дали некој од гостите е алергичен на одредена храна.
Фотографирање на децата
Балоните, тортите, декорациите и големите фотореквизити се одлични за создавање неверојатни фотографии. Но, овие работи се совршени до моментот кога ќе пристигнат децата. Затоа, фотографирајте го детето пред да започне забавата.
Потребен е добар план
Иако планирањето роденденска забава не мора да биде тешко, потребен ви е добар план. Ако сте преоптоварени со сите детали, веројатно е најдобро да резервирате роденденска забава на вашето дете во место каде што ќе имате помош. Тогаш ќе можете да се фокусирате на, на пример, испраќање покани, а вработените ќе ви помогнат за сите други (помали) работи.
912