Многу истражувања покажуваат дека единците се еднакво среќни и здрави како и децата што имаат браќа и сестри. Но, нивното одгледување носи специфични предизвици кои бараат посебна чувствителност и внимание.

Психологот д-р Саманта Родман Вајтен, која и самата пораснала како единка, открива што треба да имаат предвид родителите за нивното дете да развие здрави односи и чувство на припадност.

Да се биде дете-единец има свои предности, но и моменти на осаменост што родителите често не ги забележуваат. За да им помогне на семејствата подобро да ги разберат потребите на овие деца, д-р Вајтен споделува практични совети кои можат да им го олеснат секојдневието и на родителите и на децата.

Не сте нивна играчка, ниту најдобар другар

Децата без браќа и сестри треба да поминуваат што повеќе време со врсници. Спонтаната игра, дружењето и контактот со роднини ја развиваат социјалната интелигенција и чувството на припадност. Родителите можат да се вклучат во играта, но не можат целосно да го заменат детското друштво и тоа е во ред.

Не мора секогаш да победува

Многу родители им попуштаат на децата во играта, но ако секогаш победуваат, тие добиваат погрешна слика за фер натпреварување. Понекогаш треба да изгубат затоа што така учат да ги прифатат реалноста и поразите со достоинство.

Ако имате брачни проблеми, побарајте помош

Конфликтите меѓу родителите силно влијаат врз детето, а единците тоа го доживуваат уште подлабоко бидејќи немаат со кого да го споделат. Разговор со терапевт или брачен советник може да биде од голема корист за целото семејство.

Не оптоварувајте ги со грижите за возрасните

Децата-единци често изгледаат позрели бидејќи повеќе време минуваат со возрасни, но тоа не значи дека треба да слушаат за финансии, брачни проблеми или семејни конфликти. Дозволете им да останат деца – тоа е нивното време за безгрижност.

Размислете за домашно милениче

Многу деца-единци што имале домашно милениче велат дека тоа го направило нивното детство посреќно. Кучето и мачето можат да бидат извор на утеха, придружба и врата за нови пријателства.

Одете на излети и патувања со пријател

Без разлика дали се работи за море, планина или забавен парк, искуствата се поубави кога се споделуваат. Ако можете, поведете и пријател или роднина на слична возраст, така децата ќе се чувствуваат порелаксирани и посреќни.

Телевизијата не е непријател

Децата-единци често преку медиумите откриваат што им е интересно на нивните врсници. Престрогите забрани можат да ги изолираат од разговорите со другите деца. Наместо целосна забрана, одржувајте рамнотежа и разговор за тоа што гледаат.

Имате право на сопствен живот

Некои родители целосно му се посветуваат на детето, но тоа може да создаде нездрава зависност. Покажете му дека имате свои интереси, пријатели и време за себе. Така учи дека е нормално да биде самостојно и дека љубовта не се мери со постојано присуство.

Не ставајте го детето во улога на свој „спасител“

Изрази како „Што би правела без тебе?“ можат да создадат чувство на одговорност за вашата среќа. Нека знае дека го сакате, но дека вие сте возрасниот кој се грижи за своите емоции.

Сакајте го детето такво какво што е

Децата-единци често чувствуваат притисок затоа што се единствени во фокусот на родителите. Покажете му дека го сакате поради неговите лични особини како смислата за хумор, љубопитноста, нежноста и дека не би посакале ниту едно друго дете освен него.

Извор