Желбата да се биде совршен родител е природна, но правењето грешки во родителството не е знак на неуспех. Тие се нормални, дури и неопходни за развојот на децата. Развојниот психолог Ализа Пресман објаснува дека преку грешките во родителството децата учат важна лекција – дека правењето грешки не е исто што и да се биде лош човек. Ова им помага да се ослободат од притисокот на совршенството и да пораснат во посреќни и поуспешни луѓе.

-Ако децата не ги виделе нашите грешки, ќе им биде тешко да поверуваат дека им е дозволено да прават грешки и да растат, а сепак да бидат сакани и ценети – истакнува Пресман.

Грешките се неизбежни

Грешките во родителството се случуваат секој ден – од заборавање на омилената ужина на вашето дете до кажување нешто што не треба да го кажувате.

-Ние се раѓаме како родители само кога ќе се роди нашето дете. Секако, ќе правиме грешки цело време затоа што учиме сами. Тоа е неопходен дел од родителството – вели Пресман.

Извинувањето е клучно

Не е важна самата грешка, туку како родителот реагира потоа. Пресман советува родителите директно да се извинат, што таа го нарекува „поправање“. Детскиот психолог Това Клајн истакнува дека децата можат да го сфатат испадот на родителот многу посериозно отколку што родителот мисли. Затоа едноставните изјави како „Жал ми е што викнав“ или „Жал ми е, не требаше да го кажам тоа“ можат да направат голема разлика.

Децата учат гледајќи ги своите родители

Децата најдобро учат преку пример. Ако сакате да бидат помалку опседнати со екраните, покажете им преку вашето однесување дека нивниот телефон не треба да им биде в раце цело време. Ако сакате да бидат активни, дозволете им да ве видат како вежбате.

Децата апсорбираат сè, од вашите вредности и како се справувате со проблемите до зборовите што ги кажувате кога мислите дека не слушаат.

-Ако сакате вашите деца да пораснат во одговорни, вредни и среќни луѓе, покажете ги тие особини сами – појаснува едукаторот Тео Волф.

Извор