Причини зошто стапките на неплодност растат во светот
Нова глобална анализа открива загрижувачки пораст на стапките на женска неплодност во изминатите три децении, особено кај жените на возраст од 35 до 39 години.
Според истражување објавено во списанието „Сајнтифик рипортс“, бројот на жени погодени од овој проблем се зголемил за дури 84 отсто во периодот од 1990 до 2021 година со повеќе од 110 милиони случаи регистрирани во 2021 година. Истражувањето се заснова на податоци од Глобалното оптоварување со болести и вклучува проекции до 2050 година. Анализата опфаќа 204 земји и користи софистицирани модели за предвидување на трендовите, нагласувајќи регионални и возрасни разлики во оптоварувањето.
Најголем товар поднесуваат жените во доцните репродуктивни години. Во возрасната група од 35 до 39 години стапката на застапеност е за околу 20 отсто повисока отколку кај жените во раните триесетти.
Причини за неплодност
Причините за неплодност се многубројни: од хормонален дисбаланс и нарушувања во овулацијата, до влијанието на загадувањето и генетски фактори. Исто така, забележана е поврзаност со други здравствени проблеми, како што се ендометриоза, рак и кардиоваскуларни болести.
Географски и демографски разлики
Азија, особено Кина и Индија, има најголем апсолутен број случаи, додека Источна Азија има највисоки стапки стандардизирани според возраст. Наспроти тоа, Австралија и Нов Зеланд имаат најниски стапки. Нагло зголемување е забележано во Латинска Америка, додека стапките опаднале во Океанија. Земјите со средно ниво на социо-економски развој бележат најголем број случаи.
Иако се предвидува благо намалување на вкупниот број жени што страдаат од неплодност до 2050 година, стапките стандардизирани според возраст ќе продолжат да растат, главно поради стареењето на населението, подобрените дијагностички методи и промените во животните навики.
Авторите на истражувањето предупредуваат дека и покрај благото намалување на вкупниот број случаи, женската неплодност мора да се третира како растечки предизвик за јавното здравје. Потребни се превентивни мерки, рана дијагноза и подобрени политики за репродуктивно здравје, со посебен акцент на постарите жени и ризиците поврзани со животната средина.
