Премногу екрани, премалку движење: Сѐ повеќе деца имаат развојни проблеми
Летниот распуст е идеална можност децата да се оддалечат од екраните во кои гледаат со часови секој ден. бидејќи децата сега се движат сè помалку и поретко играат на отворено, уште кај најмалите веќе се забележуваат сериозни развојни тешкотии, а прекумерната телесна тежина кај голем број деца станува посебен проблем.
Нешто што некогаш беше игра, денес стана пречка
На часовите по физичко образование сè почесто има деца што не можат да изведат ни основни вежби.
– Во минатото не беше проблем кога децата требаше да направат колут напред или назад. Денес им е страв и не го изведуваат правилно. Речиси никој од учениците не може да се искачи на јаже – вели Иванчица Тајсл Драгиќевиќ, наставничка во основно училиште во Загреб.
Алармантни податоци: Сè послаба моторика и концентрација кај децата
Движењата што порано доаѓаа природно денес им создаваат проблеми на девет од десет ученици. Истражувањата покажуваат дека моторичките способности на децата се значително послаби отколку пред 60 години.
– Денешните деца се двојно побавни, послаби, помалку координирани и не толку прецизни – објаснува проф. д-р Вилко Петриќ, декан на Педагошкиот факултет при Универзитетот во Риека.
Исто така, се забележува дека децата не ги користат еднакво левата и десната страна од телото.
Сè повеќе деца имаат тешкотии и со фината моторика. Не знаат правилно да држат молив, не умеат да сечат со ножички или да закопчаат копче. Поради тоа, дури 10 отсто од нив добиваат одложување на уписот во училиште.
Проблемот не започнува во училиште, туку дома, пред екранот
Наместо да трчаат во паркот, денешните деца брзо ги движат прстите на екраните.
Една од последиците е и тоа што секое трето дете на школска возраст има вишок килограми.
Ако не се промени седентарниот начин на живот, моторичките вештини нема повеќе да се развиваат природно, како некогаш.
– Сè што прават децата треба да го прават во движење. Движењето е биолошки природен дел од нив. Тие преку него учат, истражуваат, растат – објаснува проф. д-р Вилко Петриќ.
Летниот распуст е совршена шанса за тоа. Секој момент поминат далеку од екраните е чекор кон поздрава иднина.
