Дали знаевте дека вечерата што ја јадете на маса како семејство може да биде совршен родителски трик? На крајот на краиштата, како би можеле да ги подобрите училишните перформанси, самодовербата и целокупната благосостојба на вашите деца за само половина час?

Одвојте само неколку минути секој ден за да ги исклучите екраните и искрено да се поврзете додека јадете. На овој начин ги зголемувате шансите за подобро физичко и ментално здравје на сите членови на семејството.

Кои се другите придобивки од заедничкиот оброк на една маса, во кој може да ужива целото семејство?

Заедничкиот оброк поттикнува поздрави навики во исхраната

Јадењето оброци со членовите на семејството е поврзано со подобра исхрана во целина, особено кај адолесцентите, според наодите од спроведеното истражување. Тинејџерите што јаделе со семејството имале поголема веројатност да консумираат повеќе овошје и зеленчук. Исто така, тие имале помала склоност кон брза храна и засладени пијалаци. Дополнително, не мора да бидете совршено среќно семејство за да ги искористите овие придобивки. Студијата покажала дека децата можат да развијат поздрави навики, без оглед на тоа колку е функционално семејството.

Заедничките оброци помагаат да се спречат нарушувања на менталното здравје

Според прегледот од 2015 година од група канадски истражувачи, честите семејни вечери можат да спречат проблеми со нарушувања во исхраната. Исто така, адолесцентите имаат помала веројатност да консумираат алкохол и психотични супстанции. Истовремено се намалуваат шансите за насилно однесување, депресија и самоубиствени мисли.

Истражување на Американското здравствено здружение од 2022 година покажало дека 91% од родителите изјавиле оти нивните семејства биле значително помалку под стрес кога редовно јаделе заедно.

Заедничките оброци можат да ги спречат проблемите со тежината во зрелоста

Студија од 2015 година открила директна врска помеѓу зачестеноста на заедничките семејни оброци во адолесценцијата и намалената шанса за дебелина, или проблеми со тежината 10 години подоцна. Заклучокот од анализата на истражувањето бил дека семејствата треба да се обидат да се соберат заедно за најмалку еден или два оброци секоја недела, за да ги спречат нивните деца да се борат со тежината подоцна во животот.

Стапката на дебелина кај возрасните е помала доколку семејните оброци што децата ги јаделе заедно со нивните родители биле готвени дома.

Заедничкото јадење може да ја подобри самодовербата кај децата

Важно е да ги поттикнете децата да зборуваат за својот ден и да ги слушате нивните одговори искрено и со концентрација. Така им соопштувате дека ги цените и ги почитувате. На децата треба да им се дозволи сами да си ги изберат местата на масата и да се охрабрат да помогнат во поставувањето на масата, сервирањето на храната или расчистувањето.

Покрај општото здравје и самодовербата, социјалната интеракција и тематските дискусии околу масата за вечера можат да ги подобрат комуникациските вештини на детето.

Семејните оброци ќе му помогнат на детето да се справи со насилството од врсниците

Едно истражување од 2014 година, во кое биле анкетирани речиси 19.000 ученици, открило јасни врски помеѓу сајбер-малтретирањето и анксиозноста, депресијата и злоупотребата на супстанции. И со тоа што дури 1 од 5 млади луѓе доживува некаков облик на сајбер-малтретирање, тоа е навистина голем проблем.

Сепак, тинејџерите што вечерале со своите семејства (идеално четири или повеќе пати неделно) изјавиле дека имаат помалку проблеми со своите врсници. Авторите на студијата забележуваат дека редовниот контакт со семејството го олеснува родителското водство и отворената комуникација меѓу децата и нивните родители.

Извор