Малата Инеа е храбро мало девојче кое уште при своето раѓање се соочи со големи проблеми во животот. Родена во соседно Косово, судбината ја носи во клиничката болница „Жан Митрев“ по барање на нејзините родители. Ја запознаваме првин нејзината мајка, која видно загрижена ја гушка малата Инеа велејќи: „Сега е добро. Сега е многу подобра. Ви благодарам на сите“.
– Доктор Митрев направи чудо со моето дете, за тоа вечно ќе му бидам благодарна – почнува да раскажува оваа загрижена мајка, која дури и со доза на неверување се радува на позитивните промени што ги има кај нејзиното бебенце десетина дена по направената операција.

– Сигурна сум дека е подобра. Чувствувам дека е така. Ја чувствувам Инеа по дишењето, по стисокот на нејзината рака врз мојот прст, по желбата за храна, едноставно знам дека ќе биде многу подобра, а толку многу маки видовме и страв кој ни се всади во коските – вели мајката на Инеа, која се навраќа на месеците изминати во страв и очајно барање спас за своето дете.

Деновите на ризик и неизвесност се поминати. Инеа сега закрепнува од комплицираната операција што ја изведе д-р Жан Митрев со својот тим. По ова, работата во свои раце ја зедоа педијатрите во педијатрискиот дел за интензивна нега во „Жан Митрев“.

Д-р Ѓорѓи Филев, педијатар во „Жан Митрев“, појаснува дека Инеа била во многу тешка состојба, состојба која барала итна интервенција без одлагање.

– Инеа е 6-месечно доенче кое дојде во нашата болница поради тешкотии во дишењето, болки во градите, замор и слабо напредување во телесната тежина. По приемот во нашата болница следуваа низа детални испитувања кои вклучуваа лабораториски иследувања, ехо на срцето, како и компјутерска томографија на срце, со што се потврди дијагнозата аномален излез на коронарна артерија од пулмонална артерија. Како последица на ова, срцето се оштетува, ослабува неговата функција и станува проширено. По комплетирањето на сите испитувања се постави индикација за оперативно лекување што вклучуваше реинплантација (пресадување) на коронарната артерија од белодробното стебло на правилната позиција, на почетниот дел од аортата, исто така се коригираше и белодробната артерија со перикарден пач – објаснува доктор Филев.

По тешката операцијата, за Инеа имало период на престој на Интензивното одделение каде што се следеле сите нејзини витални параметри, биле вклучени многу лекарства кои ја поддржуваат работата на срцето, дишењето, работата на бубрезите.

Малата Инеа добро се изборила со оваа состојба и како се подобрувала нејзината состојба, така постапно се исклучувале сите терапии и лекарства што се применувале кај неа.
– Прво се исклучи поддршката од механичката вентилација, а потоа и сите лекови што служеа за да се стабилизира работата на срцето. Набрзо потоа Инеа почнавме да ја храниме со мала количина млечна формула, која постапно се зголемуваше – велат педијатрите.
Се почнало и со физикална терапија за да се подобри дишењето и циркулацијата во целото тело. Кога целосно се стабилизирала состојбата, Инеа се поврзала со мајка си.

Инаку, алкапа синдромот или познат како Bland-White-Garland syndrome е ретка вродена срцева маана што се појавува кај 1 од 300.000 живородени дечиња и опфаќа 0,25% од сите срцеви маани. Се карактеризира со недостиг на крв во срцевиот мускул кој доведува до срцев инфаркт и срцева слабост и ако не се лекува, 90% од пациентите завршуваат фатално.
– Затоа раното дијагностицирање и хируршки третман се од извонредна важност за заштита на срцевиот мускул и нормален живот за овие пациенти – појаснува д-р Филев.

Инеа замина во својот дом, каде што успешно закрепнува во прегратките на своето семејство.
(Комерцијална објава)