Кај бебињата лесно е да се препознае кога се среќни: таа гласна, срдечна смеа, широките, насмевки (без заби) и возбудените плачења кажуваат сè. Но, како што растат, емоциите стануваат посложени, а среќата… па, малку поприкриена. И тоа може да биде фрустрирачко за родителите. Една студија во САД покажала дека дури 73 отсто од родителите ја сметаат среќата за најважна цел во родителството, додека успехот е само со 20 отсто на таа скала.

Па, како знаете дали вашето дете е навистина среќно?

Еве што велат експертите:

Смеење и насмевки без причина

Ако вашето дете често спонтано се смее или се насмевнува додека си игра или само го набљудува светот, тоа е многу добар знак.

-Телото и говорот на телото се првиот начин на кој децата покажуваат емоции – вели д-р Аријана Хоет, детски психолог во детската болница „Нејшнвајд“.

Игра и љубопитност на секој чекор

Среќните деца си играат со други деца, сами, со играчки, кутии, со бубачките, со сè.

-Играта е знак дека детето се чувствува безбедно – вели д-р Харшасу Барот, детски психијатар.

Кога децата поставуваат прашања и му се восхитуваат на светот, знаеме дека добро им оди.

Го покажуваат целиот спектар на емоции

Среќно дете не значи дете кое постојано се смее.

-Вистинската среќа доаѓа од чувството на сигурност и прифаќање – вели д-р Барот.

Значи, кога вашето дете знае дека е во ред да биде тажно, луто или разочарано и знае дека ќе бидете тука за него, тоа е голем плус.

Имаат пријатели и знаат како да се поврзат

Децата што се среќни обично сакаат да поминуваат време со други луѓе, без разлика дали тоа се другарите или семејството.

-Играњето заедно, споделувањето, смислувањето игри заедно, сето тоа се знаци на здрави врски – вели д-р Бренди Шуман, клинички професор по психологија.

Покажуваат самодоверба и знаат како да се заложат за себе

Среќните деца не се оние што постојано бараат надворешна потврда.

-Дете кое не се плаши да прави грешки и не се воздржува од поставување прашања. Тоа е дете кое се чувствува безбедно – објаснува терапевтката Рејчел Голдберг.

Имаат рутина и живеат здрав живот

Добриот сон, здравата храна и вежбањето не се клишеа.

-Физичкото здравје и менталното здравје одат рака под рака – вели д-р Кети Хопкинс од Детската болница Нортон.

Бараат блискост

Прегратки, гушкање, слатки зборови… кога детето бара само поврзување, тоа многу кажува.

-Среќните деца покажуваат интерес за другите и сакаат да се поврзат – вели д-р Хоет.

Изолацијата може да биде знак дека нешто не е во ред.

Благодарни се и позитивни

Ако вашето дете знае да каже „благодарам“ и е искрено среќно за малите нешта, вие сте на вистинскиот пат.

-Дете што го гледа светот низ позитивна призма и се радува на иднината е среќно дете – истакнува д-р Хопкинс.

Имаат свои интереси и со нетрпение очекуваат нови работи

Среќните деца сакаат да прават нешто, и тоа не мора да биде совршено.

-Дури и кога детето ќе проба нешто и брзо ќе се откаже, важно е дека сакало да го проба уште на почетокот. Тоа е знак на внатрешна мотивација и сигурност – вели Рејчел Голдберг.
Брзо закрепнуваат по тешките моменти

Среќата не е само во радоста, туку и во отпорноста.

-Среќните деца знаат како емоционално да закрепнат по разочарувањето – вели д-р Хоет.

Покажуваат креативност

Кога децата цртаат, фантазираат, раскажуваат приказни, градат кули од перници. Тоа е чиста среќа.

-Креативноста и смеата честопати одат заедно – потсетува д-р Барот.

Се радуваат на успесите на другите луѓе

Ако вашето дете знае како да биде среќно за брат, сестра или другар, тоа е голем знак дека се чувствува добро во својата кожа.

-Не се сите среќни кога некој друг успева, но среќните деца често се – вели Голдберг.

Се држат до договорот

Кога твоето дете ќе каже „Имам тренинг“ и всушност ќе одлучи да пропушти некој роденден затоа што му е важен, секоја чест.

-Способноста да се издржат мали фрустрации и да се биде доследен покажува емоционална стабилност – вели Голдберг.

Автор: Карина Шиждрак

Извор