Родителството за многу луѓе претставува голем предизвик и животна улога која ги преплавува со безгранична љубов, а одредени однесувања на вашето дете можат да ви укажат дали сте добар родител.

Ако му давате љубов и внимание на детето и се трудите да го воспитате на најдобар можен начин, вие сте добар родител. Исто така, децата што добиваат љубов, внимание и насоки од родителите често покажуваат однесување што потврдува дека сте добар родител.

Еден од најочигледните знаци дека сте добар родител е кога вашето дете покажува почит кон другите. Децата што ги почитуваат другите луѓе знаат да ја ценат нивната мисла, бараат дозвола, ги споделуваат своите мислења и се однесуваат љубезно во одредени социјални ситуации.

Почитта е клучна за градење позитивни меѓучовечки односи, а децата што покажуваат почит кон другите ќе пораснат во емоционално стабилни возрасни личности кои се способни да ги контролираат своите чувства и да управуваат со своите емоции. Затоа е важно да ги научите децата на почит преку својот пример. Бидете љубезни, трпеливи и постојано потсетувајте ги на важноста од меѓусебна почит, со зборови и со однесување.

Покрај тоа, емпатијата е способноста на детето да ги препознае емоциите на другите и да одговори на нив со разбирање и внимание. Ако забележите дека вашето дете покажува сочувство кон другите, без разлика дали се грижи за помладите членови на семејството, им помага на пријателите, тоа е знак дека успешно сте му пренеле вредности на љубов и заедништво.

Развојот на емпатијата им помага на децата подобро да ги разбираат чувствата на другите, да развиваат социјални вештини и да станат повнимателни, што во голема мера придонесува за нивната емоционална стабилност и способност за решавање меѓучовечки проблеми. Затоа е важно да ги охрабрувате децата да ги изразуваат своите емоции и да ги слушаат другите. Важно е да ги пофалите кога покажуваат сочувство и помош за да разберат колку овие облици на однесување се важни во секојдневниот живот.

Децата што се одговорни ја сфаќаат важноста за исполнување на своите обврски, без разлика дали станува збор за училишни задачи, помош во домашни работи или грижа за своите работи. Експертите сметаат дека одговорноста е една од најважните карактеристики која се развива преку воспитување. Ако детето редовно ги извршува своите обврски, покажува самостојност во секојдневните задачи и ги препознава своите должности, тоа е добар знак дека во семејството се практикува позитивна дисциплина.

Одговорноста им помага на децата да станат независни, самоуверени и способни да се справуваат со предизвиците, а исто така помага и во развојот на вештини за донесување одлуки.

Децата што се воспитувани со љубов и почит често покажуваат благодарност за сè што имаат, без разлика дали станува збор за семејната грижа, материјалните добра или времето поминато со саканите личности. Децата што редовно ја изразуваат благодарноста знаат да ја препознаат вредноста на работите што ги имаат.

Благодарноста придонесува за емоционална стабилност и зацврстување на семејните врски. Покрај тоа, благодарноста ги поттикнува децата да го ценат она што го имаат и да развиваат чувства на одговорност и почит кон луѓето во нивниот живот. Корисно е да ги научите децата да ја изразуваат благодарноста со зборови и дела. Важно е да ги пофалите кога покажуваат благодарност.

Извор