Сите сакаме децата да бидат среќни, насмеани и слободни да бидат свои. Сепак, насмевките и среќата не се секогаш производ само на добри времиња – туку и чувство на сигурност. Кога детето знае дека неговиот родител го прифаќа без разлика на сè, тогаш може да го истражува светот без страв.

Важно е да се знае дека безбедноста не доаѓа од големи гестови, скапи подароци или совршени планови. Таа е изградена во мали, секојдневни работи – во начинот на кој зборуваме, како слушаме и како реагираме. Токму овие мали нешта им покажуваат на децата дека сте тука за нив, дека ги слушате, ги разбирате и ги сакате безусловно.

Еве пет начини да им го овозможите на децата тоа:

Секогаш одржувајте ги вашите ветувања

За дете, ветувањето не е само збор – тоа е симбол на доверба. Кога ветувате дека ќе го земете од градинка или заедно ќе прочитате книга пред спиење, и го исполнувате ветувањето, тоа гради чувство дека секогаш може да се потпре на вас.

Од друга страна, неисполнетите ветувања испраќаат порака на несигурност кај децата. Затоа, ветувајте го само она што знаете дека можете да го исполните. Подобро е да кажете: „Ќе дадам сѐ од себе“ отколку да давате нереални ветувања.

Именувајте ги чувствата на детето

Многу возрасни сè уште се мачат да ги препознаат сопствените емоции. Можеме да им помогнеме на децата да го научат ова уште од рана возраст. Кога ќе кажете:

„Тажен си затоа што твојот пријател си замина рано?“

„Гледам дека си лут затоа што твојот брат ти ја зеде играчката.“

Детето разбира дека е природно да биде луто, тажно или возбудено. Тоа му дава сигурност дека неговите емоции се важни и дека нема да биде отфрлено поради нив. Со текот на времето детето ќе почне да ги именува своите чувства и подобро да ги разбира, што води до емоционална стабилност.

Останете смирени кога прават грешки

Грешките се дел од растењето, но начинот на кој родителот реагира на нив е клучен за чувство на сигурност. Викањето и казнувањето предизвикуваат страв и несигурност, додека мирниот глас и разбирањето му помагаат на детето да учи од ситуацијата. Кога детето знае дека нема да биде „отфрлено“ или засрамено поради грешка, полесно му е да се осмели да проба нови работи и да развие самодоверба.

Негувајте семејни ритуали

Семејните ритуали се мали, но моќни столбови на безбедност. Тие не мора да бидат комплицирани – доволна е приказна пред спиење, заедничка прошетка, филмска вечер во петок или пица во сабота. На децата им се допаѓа предвидливоста. Кога знаат дека одредени моменти сигурно ќе дојдат, тие чувствуваат топлина и припадност. Со ритуалите, вие ја испраќате пораката: „Ова е наше време, само за нас“.

Кажете „извини“ кога ќе направите грешка

Родителите не се совршени – и децата го знаат тоа. Но, она што често го занемаруваме е дека децата учат многу од начинот на кој се однесуваме кога правиме грешки.

Кога велите:

„Извини што викнав, згрешив“.

„Згрешив, жал ми е.“

Детето гледа дека грешката не е крај на светот. Научете го дека е нормално да се прават грешки, но и дека е важно да се преземе одговорност. Со тоа му покажувате дека љубовта не е условена од совршенство, туку од искреност и доверба.

На децата им е потребна љубов, но и чувство на сигурност. Таа не се гради со големи зборови, туку со доследни постапки – преку исполнети ветувања, разбирање на чувствата, смирени реакции, споделени ритуали и подготвеност на родителите да се извинат. Кога детето расте во средина каде што знае дека е безбедно, дека никој нема да го отфрли поради грешка и дека е сакано токму онакво какво што е – тогаш има слобода да порасне во самоуверена, среќна и емпатична личност.

Извор