Самохраното мајчинство сè уште често се стигматизира како нешто што е потешко, потажно или „со недостаток“. Но, реалноста е многу посложена. Истражувањата, како и искуствата на многу жени, покажуваат дека многу самохрани мајки не само што успеваат во процесот, туку се и задоволни, самоуверени и емоционално стабилни. Секако, тие носат огромен товар на одговорност, но истовремено имаат слобода што мајките во незадоволителни или оптоварувачки врски честопати ја немаат. Еве зошто некои самохрани мајки велат дека се чувствуваат посреќни и поисполнети од кога било.

Носат одлуки без преговори

Во домот нема расправии од типот „кој е построг родител“ или караници околу правилата. Одлуките се донесуваат јасно и доследно, а децата знаат каде се границите. Експертите за родителство честопати нагласуваат дека доследноста е клучот за чувството на сигурност кај детето, а во самохраното родителство тоа често е полесно да се постигне. Бонус: децата учат како да изразат фрустрација и несогласување без викање затоа што нема родителски конфликт на кој можат да бидат сведоци.

Самохраните мајки имаат вистинска независност

Кога нема никој друг да се „вмеша“, учите сè – од менување гума и поправање домашни работи до финансиско планирање и управување со времето. Психолозите истакнуваат дека децата што растат со родител кој управува и учи нови вештини, развиваат посилно чувство на лична одговорност и самодоверба. Таквите деца подоцна влегуваат во врски затоа што сакаат, а не затоа што им треба некој за „преживување“.

Повеќе сон – и тоа не е мала работа

Истражувањата покажаа дека спиењето во ист кревет со партнер може да го скрати сонот на жените до 49 минути навечер. Кога сте мајка, тоа е луксуз што тешко можете да си го дозволите. Сонот на самохраните мајки не е прекинат од ‘рчење, палење на светлото или доцно легнување на некој друг. А експертите за ментално здравје постојано го нагласуваат истото: сонот е основа на емоционалната стабилност и отпорноста на стрес.

Имаат поголема слобода над сопствените тела

Студија од Универзитетот „Корнел“ покажа дека жените во просек добиваат од 5 до 8 килограми во првите години од бракот, а значително повеќе во незадоволителни бракови. Самохраните мајки сами одлучуваат кога да одат во фитнес-сала, што да јадат, кога да спијат и што да носат. Тие не мора да ги објаснуваат своите избори или да ги приспособуваат своите навики на очекувањата на другите луѓе – што, според експертите, силно придонесува за чувство на автономија и позитивна слика за себе.

Во очите на децата тие се суперхерои

Децата на самохраните мајки честопати со восхит гледаат како нивната мајка „успева да заврши сè“ – од печење торта на полноќ до одење на работа и присуство на училишен настап истиот ден. Развојните психолози истакнуваат дека децата во ваквите семејства развиваат длабока доверба во своите родители, но и во сопствената способност да се справат со предизвиците.

Градат исклучително близок однос со своите деца

Во семејствата со еден родител членовите повеќе се потпираат едни на други. Ова не значи дека децата растат прерано, туку дека учат соработка, одговорност и тимски дух. Блискоста што се развива често останува силна во зрелоста.

Слободно ги пренесуваат своите вредности

Кога детето живее со еден родител, тој родител станува главен модел и пример. Самохраните мајки имаат слобода да ги одгледуваат своите деца според своите вредности, без постојани компромиси и контрадикторни пораки. Експертите нагласуваат дека јасната структура на вредности е важен фактор во емоционалниот развој на децата.

Чувство на сила и личен раст

Многу самохрани мајки нагласуваат дека само во оваа улога откриле колку се навистина силни. Тие го доживуваат успехот на секое дете поинтензивно затоа што знаат колку труд, жртва и работа стојат зад тоа. Психолозите го нарекуваат ова „посттрауматски раст“ – развој на сила и самодоверба преку предизвици.

Креативноста станува секојдневие

Еден приход честопати значи повеќе креативност: домашни игротеки, забавни викенди, домашни костими и имагинативни роденденски забави. Експертите за развој на децата нагласуваат дека децата се сеќаваат на споделените искуства повеќе отколку на материјалните работи.

Нема свекрва

За многу мајки, ова е практична победа. И ако другиот родител е вклучен, има дополнителна помош без секојдневната семејна динамика.

Повеќе време „еден на еден“

Самохраните мајки често имаат луксуз да му посветат целосно внимание на своето дете во времето што го поминуваат заедно. Без споделување на фокусот, без конкуренција за внимание. Експертите истакнуваат дека квалитетното време поминато заедно е еден од најважните фактори во емоционалната поврзаност.

Тие градат животи што инспирираат

Самохраните мајки честопати несвесно стануваат инспирација за другите. Тие покажуваат дека е можно да се работи, да се воспитуваат деца, да се учи, да се расте и да не се откажува. И правејќи го тоа, им даваат дозвола на другите да пробаат нешто ново и да се охрабрат. Децата на самохраните мајки се сеќаваат кој бил тука за нив кога било тешко – кој помагал со домашните задачи, готвел, чистел, брзал од работа на тренинг или настан. Тие се сеќаваат кој останал дома кога биле болни и кој ги бодрел кога било најтешко.

Време е да се остават настрана сожалувањето и старите предрасуди и да се признае очигледното: самохраните мајки не се „помалку“ од другите – тие често се неверојатно силни, способни и инспиративни.

Автор: Карина Шиждрак

Извор