Во денешно време родителите сѐ повеќе од кога било вклучени во животите на своите деца. Тие учествуваат во секој настан, ги решаваат сите нивни проблеми и се грижат да не им недостига ништо. Иако на прв поглед оваа грижа изгледа позитивно, таа честопати носи и несакани последици, предупредува психологот и терапевт Џефри Бернштајн.

– Една од најчестите родителски грешки е претераната помош. Кога родителите постојано интервенираат и ги решаваат предизвиците наместо децата, тие не стекнуваат самодоверба, ниту чувство на самостојност. Често стануваат анксиозни, избегнуваат покомплексни задачи и тешко се снаоѓаат без постојана поддршка од родителите – објаснува тој.

Доколку постојано чувствуваме потреба да правиме сè наместо нашето дете или да го „спасуваме“ од секоја непријатна ситуација, несвесно можеме да испраќаме порака: „Не можеш сам, ти треба мојата помош.“

Овој пристап на долг рок може да ја намали вербата на детето во сопствените способности и да го оневозможи да се соочи со реални животни предизвици.

Што треба да направиме наместо тоа?

Психологот советува дека е клучно да се воздржиме од импулсот постојано да помагаме и наместо тоа да им дадеме можност на децата сами да се обидат.

– Охрабрете ги да размислат за можно решение, пофалете го трудот, а не само резултатот. Дозволете им да учат од сопствените грешки. Така ја градите нивната отпорност и им праќате јасна порака дека верувате во нив – заклучува Бернштајн.

Извор