Дали најдобар просек значи и најдобро училиште?

Во Општина Центар лани на крајот од учебната година просекот во основните училишта беше 4,57; во Аеродром 4,31, а во Карпош – 4,32. Двојки и тројки најмногу ределе основците во Шуто Оризари каде што просекот е 2,99 и во Сарај – 3,56

Основците од Општина Центар лани добиле најмногу петки, а по нив се учениците од Карпош и од Аеродром. Најслаби оценки имаат учениците од Шуто Оризари и од Сарај.
Ако се анализираат податоците за средните оценки од сите училишта на ниво на град Скопје што ги добивме од Министерството за образование и наука, може да се заклучи дека најмногу за петки се борат децата што учат во Центар. Таму лани на крајот од учебната година просекот беше 4,57, во Карпош – 4,32, а во Аеродром – 4,31. Двојки и тројки најмногу ределе основците во Шуто Оризари каде што просекот е 2,99 и во Сарај – 3,56.

Центарското „Кочо Рацин“ има највисока средна оценка

Училиште на ниво на град Скопје со најдобри резултати кога се во прашање оценките е основното „Кочо Рацин“ во Општина Центар. Таму средната оценка е 4,75, што значи дека најголем дел од учениците се суперодлични. Во оваа општина со висока средна оценка 4,6 се уште три училишта – „Димитар Миладинов“, „Гоце Делчев“ и „Коле Неделковски“. Со ваков просек 4,6 нема училиште во друга скопска општина.
Во Општина Карпош најголем просек има Основното училиште „Христијан Тодоровски-Карпош“ со 4,56, а во Аеродром речиси идентичен просек имаат „Браќа Миладиновци“ и „Ѓорѓија Пулевски“ со 4,55, односно 4,54.
Училиштето со најслаби оценки на ниво на град Скопје е „Браќа Рамиз-Хамид“ од Шуто Оризари со 2,99.

Дали најдобар просек значи и најдобро училиште?

За некои родители и ученици оценката, т.е. петката е главна цел и двигател во текот на образованието. Некои, пак, трчаат само по знаење.
– Нашиот систем за уписи во текот на целото образование е така направен што учениците што сакаат да се запишат во подобро училиште мора да бркаат високи просеци. Така е и потоа во средно, бркаат петки за упис на факултет. Затоа и кај родителите и кај децата постои таа борба за петки. Верувајте, се користат многу методи за да се дојде до таа петка – вели наставничка од основно училиште.

Јовица Остојиќ е директорот на училиштето со најмногу петки во Скопје – центарското „Кочо Рацин“. Вели дека високиот просек се должи на многу напорна работа и личен ангажман на посветените наставници.
– Ако добро функционира врската наставник-ученик-родител, успехот е неминовен. Нашите наставници постојано работат на својот професионален развој. Тие се епицентарот на знаењето и секако треба да работат на тоа како да им го пренесат на учениците. Сите тие се квалитетни, со правилен психо-физички развој, но тврдам дека за успехот најмногу е заслужен еден наставник – вели Остојиќ.

Го прашавме директорот и дали оценката е мерило за успех, односно дали тоа што имаат најдобар просек значи и дека се најдобро училиште?

– Во нашето училиште има описно и бројчано оценување. И за двата типа оценување наставникот мора да има аргумент зошто ја ставил оценката. Секоја оценка има своја заднина и најважно е што како трајно знаење добил ученикот. Потврда дека нашите петки се заслужени се и многубројните награди што учениците ги освојуваат на сите државни, регионални и меѓународни натпревари.

„Кочо Рацин“ е едно од најстарите училишта во Скопје. Зградата е изградена одамна и директорот вели дека со оглед на тоа колку е стара, добро е одржувана, но далеку е од солидна.
– Директор сум само еден месец и еден од приоритетите е малку инфраструктурно да го средиме школото. Имаме проблем кога врне. Вода влегува во просториите и ги поплавува. Ако дојдевте вчера, со чизми ќе требаше да влезете во холот. Заедно со Општината ќе работиме да го средиме ова бидејќи најдоброто училиште во градот заслужува да има подбори услови – вели Остојиќ.

Директорката на училиштето со најголем просек во Карпош, „Христијан Тодоровски-Карпош“, Лиде Симјаноска, вели дека нивниот успех е резултат на учениците, на нивниот труд и работа, но секако и на наставниците.
– Систематска редовна работа, вложување труд, несебичност од страна на наставниците и учењето на учениците, секако. Рејтингот на училиштето го градат сите вклучени во образовниот процес. Добриот глас ќе се чуе. Нашите ученици го задржуваат одличниот успех и во средно, а 90 отсто завршуваат факултет. Тоа е показател за квалитет – вели таа.

Во продолжение го објавуваме списокот со средните оценки на крајот од ланската учебна година на сите скопски основни училишта: