Нутриционист открива што не им дозволува на своите деца да јадат
Нутриционистот Кристен Лоренц, со повеќе од 18 години искуство, открива пет работи што никогаш не би им ги дозволила на своите деца кога станува збор за храната. Лоренц често споделува совети за здрава исхрана, а овој пат го претстави својот список „забранети работи“ од перспектива на мајка, верувајќи дека може да биде корисен и за други родители.
Нема јадење грицки директно од кеса
Првото правило се однесува на јадење грицки директно од пакувањето.
– Ако е тоа пакување за една порција, во ред. Но ако станува збор за голема кеса чипс или нешто слично, мора да се стави во чинија – објаснува таа и додава дека не го користи зборот „порција“ пред децата, но сака тие да разберат колку точно јадат.
Превенција од задушување
Второто правило е поврзано со безбедноста.
– Не им дозволувам на моите деца да јадат грозје или чери домати во мојот дом без надзор, освен ако претходно не ги пресечам на половина – истакнува таа.
Без лажни алергии
Лоренц инсистира нејзините деца никогаш да не тврдат дека имаат алергија само затоа што не им се допаѓа некоја храна.
– Долго време работев во прехранбената индустрија и сметам дека вистинските алергии треба да им се остават на луѓето кои навистина ги имаат. Во ред е да не сакате нешто, но немојте да тврдите дека сте алергични – објаснува таа.
Без потценување на туѓата храна
Продолжувајќи на претходното правило, Лоренц забранува омаловажување на храната што некој друг ја сака.
– Во ред е да не ви се допаѓа нешто, но немојте да кажувате дека е одвратно. Секој сака различни вкусови и тоа е сосема нормално – вели таа.
Ограничен пристап до сокови и газирани пијалаци
Последното правило, кое таа го смета за прилично вообичаено, е ограничувањето на пристапот до сокови и газирани пијалаци.
– Моите деца сакаат цело овошје. Очигледно, газираните пијалаци немаат хранлива вредност, затоа дома пијат вода и млеко – вели таа.
Сепак, тоа не значи целосна забрана.
– Повремено можат да се напијат сок или газиран пијалак. Не сакам да чувствуваат дека е строго забрането и да развијат комплекси, но тоа едноставно не е дел од секојдневието.
