За некои родители, хранењето на децата е фрустрирачко. Ако имате пребирливо дете, веројатно ќе ви биде полесно да слушнете дека тоа не е ваша вина. Имено, според истражување на истражувачите од Универзитетот во Лондон, Кралскиот колеџ во Лондон и Универзитетот во Лидс, пребирливото јадење во голема мера е поврзано со генетиката.

– Мораме да нагласиме дека таквото однесување не е резултат на лошо родителство. Разликите што ги гледаме кај децата во однос на исхраната се резултат на генетиката – вели д-р Зејнеп Нас, еден од водечките автори на истражувањето.

Истражувачите ги споредиле податоците на 4.804 близнаци родени во 2007 година во Велика Британија. Тие ги проучувале сличностите во пребирливоста помеѓу двојајчените близнаци, кои обично споделуваат 50 отсто од нивните гени, и еднојајчените близнаци, кои делат 100 отсто. Податоците се собрани од серија прашалници кои родителите на близнаците ги пополнувале кога нивните деца имале 16 месеци, и 3, 5, 7 и 13 години.

Пребирливоста во исхраната се зголемува на возраст од 16 месеци до 7 години

Истражувањето, за кое се верува дека е прво од ваков вид, на крајот заклучи дека двојајчените близнаци се помалку слични во однесувањето на хранењето отколку идентичните близнаци, што укажува на силна генетска врска.

– Се надеваме дека ова ќе ја ублажи вината што ја доживуваат многу родители и дека за многу луѓе е смирувачко да знаат дека генетиката игра голема улога во објаснувањето зошто некои деца се попребирливи од другите во однос на храната што сакаат да ја јадат – истакнува д-р Нас.

Истражувањето покажа и дека пребирливото јадење се зголемува на возраст од 16 месеци до 7 години, а потоа опаѓа како што детето се приближува до адолесценцијата. Имајте на ум дека во моментов не постои генетски тест за пребирливо јадење, иако д-р Нас вели дека истражувањето е во тек и во однос на таа тематика.

Извор