Децата речиси никогаш нема да ви кажат дека се уморни, но ако ги препознаете знаците на замор навреме, можете да спречите плачење и хистерија. Понекогаш заморот се јавува како резултат на преголема стимулација и активности во текот на денот, а важно е родителите да знаат како да ги препознаат овие суптилни сигнали.
Постојано сака да биде покрај вас
Ако забележите дека детето цело време е до вас, ве следи од соба во соба или бара постојан физички контакт, тоа може да биде знак дека му е потребна емоционална сигурност. По интензивен ден, децата често бараат близина со родителите како начин да се смират и да ја намалат анксиозноста.
Промени во апетитот
Ако детето одеднаш изгуби интерес за омилената храна или почне да избегнува оброци што инаку ги сака, тоа може да биде поврзано со замор или стрес. Понекогаш, уморот предизвикува привремени промени во апетитот, а децата често и не се свесни зошто не им се јаде.
Фрустрација поради најмали ситници
Дали некогаш сте забележале дека детето почнува да плаче затоа што не успеало да ги стави чорапите од првиот обид? Или дека нервозно реагира на нешто што вообичаено не би му пречело? Ова може да биде знак дека е веќе преоптоварено и дека дури и најмалите тешкотии му изгледаат како огромен проблем.
Губи интерес за омилените активности
Ако детето кое обично е весело, зборливо и активно одеднаш станува тивко и повлечено, тоа може да биде сигнал за умор. Децата понекогаш сами се повлекуваат од активности што ги сакаат бидејќи едноставно им стануваат „премногу“ во моментите на стрес или замор.
Како можете да му помогнете на вашето дете?
Создајте мирна средина – Поминете време со детето правејќи тивка активност, како што е боење, читање или едноставно гушкање. Ова ќе му помогне да се смири и да се опушти.
Слушајте, без да нудите веднаш решенија – Понекогаш на детето не му треба совет, туку само разбирање. Наместо веднаш да се обидувате да го „поправите“ проблемот, оставете го да сподели што го мачи.
Обезбедете доволно време за одмор – Ако забележите дека детето е преморено, размислете за намалување на активностите во наредните денови. Понекогаш, викенд поминат во домашна атмосфера со семејството е сè што му е потребно за повторно да ја врати својата енергија.
912