Има моменти во животот на нашите деца кога тие го фаворизираат едниот родител. Родителите честопати го доживуваат ова како отфрлање.

Секако, ќе посакаат да ги вратат довербата и љубовта, како и бескрајното внимание што некогаш го уживале на кој било начин. Иако е сосема нормално детето да има омилен родител во одреден момент, тоа може да биде вознемирувачко за родителите. Добрата вест е дека експертите велат оти постојат нежни, практични начини за повторно поврзување и зајакнување на врската. Еве што имаат да кажат различни експерти:

Дозволете му на детето да води – и слушајте

Ако чувствата на вашето мало дете одеднаш се чини дека одат само во една насока, првиот чекор е да го слушате вашето дете.

-Рефлексивното слушање, кое може да биде едноставно како повторување на она што го кажало вашето дете, му покажува дека го слушате и дека го одобрувате она што го кажало – вели Кристин Едвардс, психолог.

Ова може да изгледа вака: Ако вашето дете реди коцки, вие стоите настрана и не правите ништо, туку само велите: „Леле, ги редиш коцките навистина високо!“ или „Ми се допаѓа како ги редиш коцките толку нежно.“ Дури и 5 или 10 минути ваков вид игра можат да направат чуда.

Преформулирајте го отфрлањето со љубопитност

Кога вашето дете ви е луто, лесно е да се почувствувате повредени. Но, љубопитноста е клучна.

-Кога вашето дете го отфрла родителот што не го сака во моментот или изразува силна преференција кон друг, преминете од чувство на отфрленост кон љубопитност. Застанете, земете здив и размислете со емпатија – вели Ен Дули, сертифициран тренер за родители.

Создајте ритуали кои се само ваши

Децата ги сакаат предвидливоста и споделените моменти. Развијте мали, лични рутини кои се само ваши – миење заби заедно, танцување по вечера, шетање на кучето. Рутините им помагаат на малите деца да се чувствуваат безбедно.

Вежбајте „време за поврзување“ предводено од детето

Ако сте родителот кој не е префериран некое време, обидете се да закажете кратко, дневно „време за поврзување“ – 10 до 15 минути кога вашето дете може да избере активност и да ѝ даде име. Можете дури и да поставите аларм за тоа време.

-Ова му дава на вашето дете чувство на контрола и доверба, помагајќи му на родителот кој не е префериран да создаде основа на почит и поврзаност – вели Дули.

Понудете начини за поврзување без притисок

Децата честопати имаат тенденција да изразуваат силни чувства кон луѓето со кои се чувствуваат најбезбедно. Прашајте го вашето дете дали сака да ви помогне да го измешате тестото за колачиња или да оди во продавница со вас.

-Не сфаќајте ја одбиената покана како отфрлање. Кога децата знаат дека притисокот е на ниско ниво, поголема е веројатноста да ве побараат – вели Едвардс.

Прославете ги специфичните напори

Кога вашето дете помага во чистењето или организирањето, користете „корисни“ пофалби наместо едноставно „браво“. Подобро е „Беше толку корисно што ги среди тие играчки!“

-Специфичните пофалби градат компетентност и самодоверба, охрабрувајќи го вашето дете да се чувствува безбедно и отворено за однос полн со љубов со помалку претпочитаниот родител – вели Едвардс.

Разговарајте за радостите што ги носи поврзувањето

-Разговарајте за моментите на поврзување со вашето дете за да може да почне да слуша и да сфаќа дека дружењето со вас му дава позитивно чувство – вели Едвардс. Тоа може да бидат реченици како: „Тие меурчиња те насмеаја!“ или „Навистина уживам да поминувам време со тебе“. Емоциите се нормален дел од човечкото искуство и нормално е малите деца да доживуваат брзи промени во расположението.

Автор: Наташа Крстичевиќ

Извор