Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Сакам да побарам мислење од вас како може да се зголеми концентрацијата на прваче. Во разговор со наставничката ми е нагласено дека не слуша наредби, дека си седи и не ги извршува обврските. А кога работи, работи многу бавно и ниту една активност не е завршена. При пишување текст, една буква ќе напише, па нешто друго си работи, пак повторно една буква… значи воопшто нема внимание и концентрација.

ОДГОВОР: Транзицијата во прво одделение претставува голема промена за децата, но и за целото семејство. Наеднаш од нив се очекува да бидат тивки, цело време да седат во своите клупи, да следат часови, да се фокусирани, да работат и веднаш да одговараат на задачите. Но детето се приспособува на новата средина, другарчињата, учителката и барањата што му се поставуваат. Некои деца лесно се справуваат со тоа, додека други треба да се надгледуваат, да се охрабруваат, да се бодрат и да се водат.

Не е лесно за детето да се приспособи на овој нов свет, во кој истовремено ги гради и когнитивните и емоционалните способности што му се потребни за да го задржи вниманието и да ги следи и извршува задачите… и за сето тоа е потребно некое време.
Важно е да се развијат работни навики, совесен и одговорен пристап кон училиштето уште од самиот почеток и ова бара дополнително вклучување на вас, родителите, во форма на следење и охрабрување, т.е. вежбање на нови навики и нивно усвојување.
Концентрацијата и вниманието се вештини кои се развиваат со текот на времето и секое дете напредува со свое темпо.

Би било добро дома да воспоставете конзистентен распоред – кога вашето дете да игра, пишува, кога да јаде, да има време за одмор итн. Јасна рутина која ќе му помага да знае што следува и како поминува денот. Почнете да давате мали и едноставни задачи што треба да ги прави дома, на пример, да им тури вода на цвеќињата, да ја постави масата, да ги собере и среди своите работи.
Кога пишува дома, потрудете се да има работна атмосфера, бидете до него и доколку задачите се поголеми, поделете ги на помали. На пр., ако треба да напише цела реченица, фокусирајте се на една буква или збор. Доколку постојано има некои други „провокатори“ за време на пишувањето, не може да очекувате дека нема да се сврти кон нив. Кога ќе забележите дека му е потребно малку време, дајте му да се раздвижи, но да не биде тоа повеќе од 5 мин., да се врати и пак да пишува. Можете да го прашате како се чувствува тогаш, што мисли, што гледа. Би било добро да ја вежбате фината моторика преку некои прецизни игри како (нижење мониста, шиење копчиња, составување сложувалки итн.), цртање, сечење, лепење и моделирање со пластелин или тесто. Кога работи и игра со овие работи, потрудете се да ги заврши докрај, прашајте дали му е потребна помош, вклучете се, но не правете ги наместо него.
Фокусирајте се на напорите на вашето дете, постојано охрабрувајте го кога ќе направи нешто, како: „Толку сум горда на тебе што ја напиша целата реченица, ајде да ја напишеш и другата, многу ми се допаѓа“ или „Браво, знам дека се измори, но многу убаво ја заврши задачата“. Дозволете му да прави грешки, преку нив детето учи. Вклучете креативни и интересни идеи, на пример, ставете часовник со стрелки и покажете кога стрелката ќе дојде дотука, да изброиме заедно колку зборови ќе напишеш итн.

Треба да бидете смирени и полни со љубов, иако во многу ситуации сте доста исфрустрирани и би сакале работите да одат поинаку. Но, на вашето дете му е потребно некој да го води, да му пренесе дека иако понекогаш е тешко, тоа може да биде и забавно, за да научи понатаму како само да ги извршува задачите, а тоа ќе го направите со тоа што постојано ќе враќате, насочувате, покажувате и ќе бидете тука. Знаеме дека понекогаш е тешко, но упорноста и доследноста се основата за стекнување нови навики.

Доколку ви е потребна дополнителна помош за тоа како да постапувате, како и за развојот на вашето дете, можете да закажете родителско советување и психоедукација на sovetuvanje@gmail.com

Одговара: Билјана Манасова-Јовановиќ, дефектолог и психотерапевт; Психотерапија и советување 
е-пошта: sovetuvanje@gmail.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца. На прашањата одговараат психолози и психотерапевти соработници на Деца.мк.