Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Би сакала да добијам совет за проблемот што го имаме. Се работи за моето 7-годишно дете кое во последно време не сака да оди на училиште, плаче, не влегува во училницата ако не е наставничката влезена. Не сака да остане сам со другите деца во одделението. Пробав да дознам што е проблемот преку прашања и мислам дека чувствува страв и несигурност ако нема возрасен до него бидејќи кажува дека се плаши да не се удри на нешто, да не падне, а почна и да не јаде на училиште зашто мисли дека ќе му залетне јадењето и дека ќе се задави. Јас сум наставничка во истото училиште и постојано доаѓа и ме бара, а потоа не оди на час, сака со мене да остане.

ОДГОВОР: Според возраста на вашето дете, тоа би требало да биде второ одделение. Затоа е важно да откриеме кога првпат се појавија овие стравови и каква адаптација детето имаше во прво одделение, како и колку време трае ваквото однесување.

Ова е важно за да се утврди евентуален стресен настан кој би предизвикал страв и несигурност. Како што и сами споменавте, стравовите на детето се викаат: Страв ми е да не се удрам и повредам;

Страв ми е да не паднам и да ме боли, да се повредам; Страв ми е да јадам за да не се задавам. Ваквите стравови се предизвикани од мисли со катастрофичен карактер, па кога детето ќе си помисли „Ќе паднам и ќе се повредам“, се јавува чувство на страв и потоа истото се манифестира со бегање или одбивање на опасноста.

Во ваква состојба на вознемиреност детето е убедено во своите мисли и се однесува според нив, но генерално се чувствува небезбедно. Потребно е да посетите детски психолог или психотерапевт каде што најнапред ќе треба да се утврди од каква природа се настанатите стравови, дали можеби се јавува страв од смрт кој е карактеристичен за оваа возраст, дали можеби тие имаат воспитна природа или се настанати по стресогени ситуации.

Одговара: Христина Стефановска, психолог за деца и адолесценти, Здружение „Хармоничен свет”

е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.