„Не јади со раце, внимавај, ќе истуриш…“ – Манирите на маса децата ги учат од вашиот пример
Без разлика дали детето јаде дома, на училиште или е на роденден кај другарче, убавите манири на маса му помагаат полесно да се снаоѓа во социјални ситуации. Затоа е важно однесувањето за време на оброк да се научи навреме.
Децата најмногу учат од пример. Ако сакате да имаат убаво однесување, покажувајте го тоа секојдневно – зборувајте културно на маса, користете „те молам“ и „благодарам“ и пофалете ги кога се однесуваат правилно. Наместо општа пофалба, кажете конкретно што ви се допаднало: „Ми се допадна што убаво побара леб.“
Клучна е доследноста. Ако го учите детето да каже „благодарам“, нежно потсетувајте го секојпат кога ќе заборави. Со текот на времето тоа ќе му стане навика.
Интересен начин за учење се и тематските семејни вечери. На пример, кинеска вечер со стапчиња. Така децата учат манири, но и запознаваат други култури.
Деца до 3 години
Најмалите имаат потреба од постојано потсетување. Почнете веднаш штом ќе почнат да јадат цврста храна. Учете ги да седат додека јадат и да си ги измијат рацете пред оброк. Игнорирајте го однесувањето со кое бараат внимание, како фрлање или плукање на храната.
Може да очекувате:
- да зборуваат со полна уста;
- да посегнуваат по туѓа храна;
- неправилно да го користат приборот.
Деца од предучилишна возраст
Тие веќе можат подобро да следат правила, но знаат да бидат пребирливи или нетрпеливи. Објаснете што се очекува од нив и пофалете ги кога се трудат. Ако направат неред, понудете решение наместо да ги карате.
Научете ги да:
- седат мирно на маса;
- почекаат сите да седнат пред да почнат да јадат;
- користат салфетка;
- јадат со затворена уста и да не зборуваат додека џвакаат;
- користат љубезни зборови.
Поголеми деца
Тие веќе ја знаат основата, но можат да учат повеќе: правилна употреба на прибор, пристоен разговор на маса, поставување и расчистување на масата, како и да не носат телефон или таблет за време на оброк.
Иако се посвесни, не очекувајте совршенство. Понекогаш ќе заборават или ќе одбијат да го следат правилото. Важно е семејните оброци да не се претворат во предавање. Тие треба да бидат пријатно време за разговор и поврзување.
