Наталија го родила второто дете 40 дена по смртта на првото: Медицинското чудо ги воодушеви дури и најискусните лекари
Случајот кој е забележан во Русија кон крајот на 2025 година е вистински медицински феномен. Наталија Артеменкова носела близнаци и сè било нормално до 24. недела, кога предвреме ѝ пукнал воденикот. Ова, за жал, довело до срцев застој и смрт на едното од бебињата. Од медицинска гледна точка, мала надеж останала за второто. И тогаш се случило чудо, кое ги воодушевило дури и најискусните лекари…
Во такви околности, породувањето е неизбежно за да се спаси уште другото дете. Но, тоа тежело само 590 грама. Наместо да го следи стандардниот протокол, тимот предводен од главната лекарка на регионалната болница, Елена Разумеева, донел невидена и исклучително ризична одлука: да стори сè што е можно за да ја продолжи бременоста.
Ова било чекор во непознатото бидејќи слични случаи не се евидентирани во руската практика во последните две децении, а меѓународната медицинска литература опишува само изолирани случаи.
Секој од следните 40 дена бил исполнет со вознемиреност. Борбата не престанала ниту за минута, бидејќи животот на другото бебе бил цело време во опасност. Наталија била под 24-часовен надзор. Лекарите морале да ја подложат на сложени третмани за да ги контролираат понатамошните контракции и да спречат инфекции. Ситуацијата била дополнително комплицирана од друг фактор: таа имала лузна на матката од претходен царски рез, што ја направило бременоста особено небезбедна и опасна.
-Страшно беше. Неверојатно страшно… Не можете ни да претпоставите што ве чека. Не знаете што да правите, не можете да влијаете врз ситуацијата. Тешко е да се опише чувството – се сетила Наталија.
Од друга страна, секој нов ден што бебето го поминувало во матката ги зголемувал неговите шанси за преживување без тешки компликации за три до четири проценти. Неонатолозите и специјалистите за интензивна нега не ја оставале бремената жена сама ниту за минута.
По шест недели неизвесност, Наталија ја родила својата ќерка со царски рез. Девојчето, по име Марија, тежело 1.250 грама. Нејзината состојба била оценета како стабилна и задоволителна, но не можела сама да дише. Таа останала на интензивна нега 16 дена. По долг период на набљудување и закрепнување, мајката и нејзината мала хероина можеле да си одат дома.
-Првиот пат кога ја држев имаше само 1,2 килограми. Беше толку мала, како маче. Не можев да верувам. Помислив: „О, Боже, како можам да се грижам за тебе? Како воопшто можам да те држам?“ Но, имав прекрасна поддршка, ми дадоа совети, ми покажаа што треба да направам… – рекла мајката.
Толку долго одложување на породувањето е навистина ретко, а слични случаи каде што интервалот помеѓу смртта на еден фетус и раѓањето на друг е повеќе од еден месец може да се избројат на прстите од едната рака. Лекарите го нарекле резултатот уникатен подвиг, а самата приказна станува пример за неверојатниот дострел на модерната медицина.
